Union of Burma Kawlram ah 1947 in atu 2020 tiang Party pi pakhat lawng nih an Kan uk peng. Phahsapala party, Socialist party, Military regime (Ralkap Uknak), USDP le NLD party pakhat nawlngeihnak in kanram an kan hruai peng caah kan ram a tthangcho khawh lonakbik asi.Party Phunphun Democracy tiah kan au khuang len ko nain a taktak ahcun Party Pakhat uknak lawngin kan kal peng caah kan ram hi sifak lei a panh. Cun Kawlram ah Party Fonh Hoiser (Coalition Government in ram an kan hruai bal bak lo. Kawlram cu miphun cawh le nunphung cawh in khua asami ram kan si caah Party Phun Hoiser mi Coalition Government lawng nih ram a ser khawh lai. NLD nih maw USDP nih maw Landslide in teinak an hmuh peng ahcun zei tik hmanh ah kan ram aa thleng kho lai lo ti kha kan i fiang cang a hau. NLD tthawngtuk maw USDP Tthawngtuk maw a tha lo hrimhrim. A bik in Tlangcungmi kan caah a tthalo khun. 2020 ah NLD nih 2015 bantuk in teinak anhmuh rih ko ahcun zeihmanh dothlengnak a um lai lo, a chia leitu ah kanram a panh chinchin lai.
2020 ah hin USDP nih 15% seat hmu kho hna sehlaw atha lai. An hmuh lai zong zumh a um ngai ve ko. Cun Tlangcungmi nih a tlawmcem in 15% seat hmu kho ve hna sehlaw NLD nih 45% seat a hmuh ve hnga. USDP nih 26% seat an hmuh ahcun kan ram caah a tha hoi fawn lo. Abiapi cemmi cu Tlangcungmi Party dihlak kan tthawng hrimhrim a hau.Atha cemmi cu kachim cang bang USDP 15% le NLD 45% asiloah 40% seat hmuh kha a tha. Ahohmanh nih Cozah an ser kho lai lo i Coalition Cozah ser a hau cang lai.
Keimah ka saduhthah ahcun Tlangcungmi party nih Ralkap le USDP he hoiser in Cozah ser usih law ti ka duh. A ruang cu NLD he kan i fonh zongah Ralkap dohbu in cun zei dothlengnak hmanh kan chuahpi kho lai lo. Phunghrampi hi thleng ding hmanh va sisehlaw Ralkap nih NLD thleng piak cu an i nautat lai. Thleng ciocio ko ahcun an mah suaimi phunghram kha anmah lila nih thleng an duh deuh hrimhrim lai. Ralkap caahcun NLD nih Phunghrampi a thlen ticu an duh hrimhrim lai lo kha a fiang tuk..Mah caahcun a zei le zei a va chiat deuh ahmaw tthat deuh ahmaw THLENNAK cu a um hrimhrim ko lai.
USDP, Ralkap le Tlangcungmi Party nih Cozah kan ser lai 45% seat a hmumi NLD cu opposing Party ah an ttha tuk cang lai. NLD cu Acozah asilailo nain Hlutdaw ahcun an thawng taktak ve lai. Tlangcungmi Party zong nih Hlutdaw ahcun a herh ningin NLD zong kan dirpi ko hna lai. Tlangcungmi kan caah a tthatnak leipoh ah kan dir lai i Hlutdaw zong sullam a ngei cang lai.
THLEN kan duh ahcun NLD le USDP nih landslide in teinak an hmuh lo kha a ttha cemmi asi. A chiat ah a tthat ah kan ipaih a hau cangmi asi. Ralkap lawnglawng nih Phunghrampi thlennak le NCA daihnak an tuah khawh ti kha philh hlah usih. 2020 cu Tlangcungmi kan caan ttha cem asi. Teinak hmuh hrimhrim kan hau. Mitchinh kamseh in Thlengnak caah kan test phot a hau cang ko. NLD lawng nih zeipoh a thleng khawh ti ruahnak kha ngei ti hlah usih.Ram Thlennak ah NLD nak in Tlangcungmi Party hi a tthawng deuh ti zong kha ruat cio hna usih.
CHANGE SADUHTHAH
Feeling Change, Credit: Jacob R. Thang
