2020 US Thimnak: Joe Biden Nih President Trump A Phomh Chih Cang

US vice-President hlun a simi Joe Biden nih thuukpi in a ruah hnu ah 2020 US President cuhnak ah ai tel lai nak kong a chim. A luh bak in a min a lang colh. Mipi nih uarkhunmi pakhat ah ai cang. President Trump zong cei lak in a phomh colh ko.

Kum 76 a si cangmi Joe Biden hi US 2020 thimnak ah hin Democratic lei in ai cuhmi a si. Amah hi tutan thimnak ah ai cuhmi chung in zumhraihmi minung 19 chung ah ai tel vemi a si. Cu minung 19 chung ah cun Senators Elizabeth Warren, Kamala Harris, le Bernie Sanders tbk hna an i tel.

Video in thawng a thanhnak ah a chimmi cu, “kan ram a man a fahnak muru…zauk phung kan sinak, zeizong te nih hin America hi America ah a ser” tiah a chim. Pu Biden nih a chimmi cu, President Donald Trump soiselnak kong ah hin a kap hnih in mittha le mi dingfel tampi an um veve ko, tiah a chim.

Cubantuk chung ah cun United States President a simi nih cun huatu hna le ttanhtu hna karlak ah khuakhaan le tthutdir thiam a biapi taktak mi a si, tiah Biden nih a chim. “Ka zumhning ah cun, a tu hnu kum 4 ah president nih a thil tuahmi hi a zoh tthan te tik ah cun, phung ninglo deuh ka ral cawlcangh lio caan a si tiah a chim te lai. Donald Trump hi kum 8 chung White House ah a um a si ah cun fundamental phunghrampi a zulmi ah kan ram hi a ser lai. Cucaah cubantuk thil a can ding cu ka tthutbu in rak zoh sawh ko cu ka celh ti lo” tiah a chim.

Pu Biden hi Democratic candidate hna lak ah cun hmuhtonmi a ngeibik a si. Senator hi term ruk chung a ttuan cang pin ah 1988 le 2008 ah khan president a rak tling dengmi a si. Cu hnu ah President Barack Obama chan lio ah khan deputy caan (term) hnih chung bak a rak ttuan bal cangmi zong a si fawn.