KAN KHAMHNAK A TLAU KHAWH LO ZIA VUN TTIAL VE NING; A. HRINTTHAN CANG MI HNA KHAMHNAK A TLAU KHAWH LO NING.
1.Fapa a zummi poh cu zungzal nunnak an ngei (Johan 3: 36). Jesuh cu atu ah kan zumh i zungzal nunnak cu kan ngei cang. Kan zumh cang caah kan ngei cang.2.Ka bia (Jesuh bia) a thei i a zummi poh cu thihnak in nunnak ah an lan cang (Johan 5: 24). Atu ah thihnak in nunnak ah kan lancang. 3.Ka kut chung (Jesuh kut chung) i a ummi cu aho hmanh nih an ka chut kho ti lo (Johan 10: 27-28). Jesuh cu a tthawngbikmi Pathian a si caah a kut chung i a ummi khamhmi hna kha aho hmanh nih laak khawh kan si ti lo. Sehtan nih Jesuh kut chung in an laak khawh rih a si ahcun Sehtan cu Jesuh nakin a cak deuh tinak a si hnga.
4.Jesuh nih zungzal nunnak ka peek hna, an rawkral ti lai lo a ti (Johan 10: 28). Jesuh cu a biakam a let lomi a si caah a kan peek cangmi zungzal nunnak kha a kan chut tthan ti lo.5.Pathian dawtnak he a kan tthen kho tu ding cu sermi thil lakah zeihmanh a um lo (Rom. 8: 31-39)Hrintthan cangmi hna ca i kan khamnak a tlau khawh ti lo ning cu Baibal cacang hi a tam tuk. Ttial cawk ding a si lo.
B. KAN KHAMHNAK A TLAU TTHAN KHO TIMI HNA NIH AN I CHIRCHANH MI
1.Kan hrintthan hnu i sualnak kan tuah lengmang ah teh?Hrintthan hnu ah sualnak a tuah peng mi cu an hrintthan lo tinak a si. Pathian fa a si lo. Hell chungin luat ding tiang in Pathian an zum lo. A hrintthanmi nihcun sualnak an tuah ah an i chir tthan i Pathian sinah an kir tthanlengmang. 2.Hrintthan mi zong biaknak dang i a luh ahcun a khamhnak a tlau ko laiHrintthanmi cu Pathian dawtnak a hngalmi an si. Jesuh velngeihnak a hngal i a cohlangmi an si. Pathian tthatnak a temmi an si. Pathian nih a Thiang Thlarau a peekmi hna an si. Cucaah hrintthanmi nihcun Pathian tthatnak hi fiangtuk in an theih cang caah biaknak dang ahcun an lut kho hrimhrim lai lo. Sui le phaisa hmanh a tthtanak kan theih caah kan hlonh bal lo. Zeitindah zeizong vialte nakin a ttha deuhmi Jesuh cu an kal taak khawh lai?
3.Sualnak kan tuahmi kan i chir manh lo i accident hna in kan thih ah tah?Pathian cu zeizong ti kho tu asi caah Pathian nih a tuaktan zia a thiam ko lai.4.Hebrew 6:4 i zumtu sualnak i a tlumi hna caah cun sual ngaihchihnak a um ti lo a ti tung?Hebrew 6: 4 nihkhin hrintthan mi, khamhnak a cocang mi hna sualnak i an tluk i ngaihthiamnak a um ti lonak kong a chimmi siselaw, vawlei cung minung vialte hell ah kan tla dih hnga. Zeicatiah hrintthan hnu ah sualnak a tuah tthan lomi ahohmanh kan um lo. Khika Baibal cacang nihcun ngaihchihnak ah kirpi khawh a si ti lo a ti caah hrintthan hnu i a sualmi nihhin an sual an i ngaihchih kho ti hnga lo i hell ah an tla dih hna. Hrintthanmi nakin hrintthan lo mi si tuhi a him deuh hnga.
C. KHAMH TLAU TTHAN KHAWH A POM MI HNA BIAHALNAK
1.Hrintthan hnu i sualnak kan tuah ruang i kan khamhnak a tlau tthan a si ahcun zeibantuk sualnak kan tuah ah dah kan khamhnak cu a tlau hnga? Lih fate chimmi zong khi sualnak tuah cu a si ko i cu ruang zong ahcun maw kan khamhnak cu a tlau ko hnga? Asi loah zei level sualnak na tuah ah dah kan khamhnak hi a tlau lai tiah nai ruah? Baibal nih a chim maw? 2.Kan khamhnak a tlau tthan kho rih ti i a zum mi hna cu hmailei i nan sual tthan te lai le nan tthat thai lai hngalh a si lo caah, hmailei i zei nan lawh lai nan i hngalh rih lo caah van nan kai lai le hell i nan tlak lai, khamh nan si lai le lai lo nan i fiang rih loh tinak a si ko lo maw? Khamh nan i fiang rih lo tinak a si ko lo maw? Kham ai fiang lo mi cu hrintthan lomi nan si ko lo maw?
3.Van kai lai le hell tlak telai hmanh nan i fian rih lo ah zeitindah Thlarau thilpeek hna kan tingco tiah nan ti khawh? Pathian nihcun hell i a tla te kho dingmi cu Thlarau laksawng cu a peek hna hnga maw? 4.Tthatnak na tuah khawh caan i khamhnak na hmuh i sualnak na tuah poh i khamhnak na sungh ahcun na tthatnak in khamhnak na co tu a si ko ne lo maw? 5.Khamhnak a comi hna cu Pathian nih a Thiang Thlarau a kan peek. Na tthat caan poh i khamhnak na co i na sual caan poh i khamhnak na sungh ah na tthat caan poh ah maw Thiang Thlarau hi na chung ah a luh hnga i na sual caan pohpoh ah a chuah tthan hnga? Cu ti asi ahcun Thiang Thlarau hi kum khat ah voi 1000 cu na cung ah a lut, a chuak lengmang hnga lo maw?
6.Sualnak tuah ruang i khamh tlau na pom ahcun na tthat caan poh ah maw Pathian fa na si hnga i sualnak na van tuah caan poh ah Sehtan fa na si tthan hnga? Sehtan fa na si le Pathian fa na si hi nichiarte in maw ai thlen lengmang ne hnga?
Credit: Rev.Dr.Aung Myint Thang