Pathian Serhsat Le Zeirel Lo Ṭih A Nunning “Mi nih mi cungah a sual ahcun Pathian nih remnak a serpiak lai, sihmanhsehlaw mi nih Pathian cungah a sual ahcun, aho nih dah a nawlpiak ti lai,? tiah a si.” (1 Samual 2:25)
Bawipa ngaihchiatter le serhsat hi ṭih a nung tuk. Kan nunning in le tuahsehnak in Bawipa ngaih kan chiatter khawh, kan biachimmi zong in Bawipa ngaih kan chiatter khawh. Kan khuaruahnak, ṭhatlonak kan ruahmi zong in Bawipa lung kan fahter khawh.
Bawipa zeirel lo in bia a chimmi, Bawipa a serhsatmi le zei ah a rel lo mi hna an nun hi ṭih a nung taktak.
1. John Lennon:John Lennon hi minthang taktak a si. Hlasak zong a thiam (Singer),hlaphuah zong a thiam. “Beatles” timi a rak dirhtu a si (Rock music group pawl an si). Interview an tuah lioah a chimmi cu: Khrihfasinak hi a dih te lai, a lotlau te lai. Cucu al awk um lo in a fiangmi a si ko, a ti. A ti rihmi cu: Beatles pawl hi Jesuh Khrih nakin kan laar deuh, a ti. Khrihfa le Jesuh Khrih zeirel lo in le serhsat ngai in bia a chim ko. Kum tlawmpal ah meithal zuun ruk in an kah i a thi.
2. Tancredo Neves:Amah hi Brazil President a si. Ramkhel lio, campaign a tuah lioah a chimmi cu: Mee (Votes) hi 500,000 ka hmuh ahcun Pathian hmanh nih president sinak in a ka ṭhial/thla kho lai lo, a ti ko. Taktak ah, mee (Votes) cu a hmuh taktak. Sihmanhsehlaw president ṭhutdan cungah a ṭhut lai ni ah a zaw i a thi ko. Prophet Elisa nih a hmuh cu na hmuh ko lai nain na ei lai lo, a timi kha a si ko.
3. Cazuza:Amah hi hlaphuah thiam a si, hlasak zong a thiammi a si. Show a tuahnak cungah kuak a zu i a kuak a pak i a khu kha a chuahter i, “Pathian, khakha nangmah caah a si,” tiah Pathian serhsat ngai in a ti. Ṭihnung ngai in cuap cancer in kum 32 a si ah a thi.
4. Titanic Tinbaw Sertu:Titanic Tinbaw cu an hun lim i, zeidah a lawh ti kha an hun hal i, Pathian zeirel lo ngai in a chimmi cu: Pathian hmanh nih a hrawk kho lai lo, ti chungah a pilter kho lai lo, a ti ko. A kum voi April 15, 1912 ah Titanic Tinbaw Pi cu, Atlantic Ocean ah a pil ruangmang ko. Minung 1500 an thi i, 705 an chanh khawh hna.
5. Marilyn Monroe:Mah nu aa dawhning hi cu a mak ko rua. Hlasak zong a thiam, mirum a si fawn. Thiang Thlarau nih, Billy Graham kha a sinah thawngṭha chim dingin a thlah i, Billy Graham nih thawngṭha cu a chimh. Monroe nih a lehmi cu: Na Jesuh ka herh lo, a ti ko. Zarh khat hnu ah muidawh minthang Marilyn Monroe cu a ihkhun cungah a ruak in an phawh ko. Mah le mah i thah dawh a si.
A kan daw i kan caah a nunnak hmanh a petu Bawipa hi kan dawt hrimhrim awk a si. Bawipa dawt cu, a bia ngaih le a duhnak tuah kha a si. Kan nun in siseh, kan tuahsernak in siseh, kan bia in siseh, Bawipa hi kan upat i sunparnak le upatnak kan pek zungzal ding a si. Kan nunning in siseh, kan biachim in siseh, kan tuahsernak in siseh, Bawipa ngaihchiattertu kan si sual nakhnga lo kan ralrin awk a si.
Credit: Rev.Ram Lian Khar