Lai le Chin kan sinak hi holh le ca nih bia a khiak kho lo, thisa le tuanbia lawng nih a khiah khawhmi a si. Lai holh a holh paoh Lai kan si lo. Lai kan sinak cu kan hrihhram le tuanbia, thisen le lungput tu nih bia a chim deuh. Chin ka si kai ti ruangah Chin ka si a rak si lo. Chin ka si lo ka ti ruang zongah Chin ka si lo hlei lo. Chin ka sinak hi hmurka le cafang nih zeihmanh lai a rak rel lo. Sinak cu chunglei in ai thokmi a rak si. Khrihfa kan sinak hi lenglei ziaza in ai thok lo chunglei in ai thok hmasa. Chin kan sinak zong hi kan chung in ai semmi tu a rak si.
Sianginn kai i phuah phun in Chin sinak in iphuah khawh phun a si lo. Nai hrawng facebook ah Chin na si ahcun CNLD kha vote ko, ti phun ca a tam ngai. CNLD ka vote lo ruangah Chin ka si lo hlei lo. Chin ram le Chin miphun dawlotu ka si hlei lo. Mithiang Paul nih Rome miphun ka sinak (Roman citizenship) hi kai cawk chom in ka ngeihmi a si lo Rome miphun sinak hi kai chuahpimi a si, a rak ti ve.
Lai miphun, Chin kan sinak hi kan identity card ah Chin kan tial ruang ah Chin kan si lo, Chin kan si ruangah kan `ial tu a si. Laimi sinak hi I chuahpi mi thil a rak si. Cucaah Chin kan si ahcun Chin Party vote hna u sih, kan ti tawnmi ruah deuh ahcun kan hruh mual kan ipho ko hi teh ka ti. Chin Party vote kan pek le peklonak nih Chin kan sinak a hnur suang kho in a tuaitam kho lo ti kan hngalh lo maw si kan i hngalhter lo bia dek. Chin na si ahcun kan inn tual rak ka thlawhpiak u ,ti ning law Chin si lo lai phan ah nan ka thlawhpiak hnga maw? Chin kan sinak hi a ho sermi pedan (rular) in kan tah lawng ah Chin kan si lai cu? Chung lei in a si lo maw?
Chin timi min hmuh poah ah Chin miphun ka dawt ti phun in hei tanpi, vai teltum colh zong hi Chin miphun kan zawtnak pakhat a si ve. Chin min put in Chin ai awh in rianttuan ttung i thangchiat le mualpho ton sual ahcun Chin miphun vialte a kan huap chih dih caah kan zumh bakmi hruaitu nih a kan hruai dah ti lo ahcun thling a za ngai.
Credit: Jehu Ukte
