A Tu Hi CNA CDF Le Ralhrang Cu Kuhchah Khua Pawngah An I Kap Cuahmah

Nihin August 11, Chunhnu In SAC Ralkap Le Chin Ralkap Kar Kahdohnak A Chuak Chin ramkulh, Hakha peng, Timit lawnh Kuhchah khua kalnak lam lei ah rallam sialtu SAC ralkap le Chin ralkap hna kar kahdohnak a chuak, tiah theih a si.Kaphnih kar kahdohnak cu suimilam pakhat luan hrawng a si cang, atu zong ah an i kap cuahmah, tiah theih a si.(Mizapi nih kan ralkap hna caah thlacam daithlang hna hlah usih.)

Relchap: Ralkap bomb nih Hniarlawn khuami Pi Chia Hnem an coka ah a tlak i a nunnak a liam cu ngaih a chia hringhran ko. Hakha le a pawngkam ummi nulepa hna cu ihkhun cung i hngilh hmanh ah hna a ngam kho ti lo dirhmun kan phan than cang ko rua.Miphun dawtu ramtang kan unau hna nih caan sau ngai khuachung i kahdohnak nan rak hrial i Hakha khuami hnangam deuh ngai in rak um a si.

Nain, tukar nan hun kah than lengmang hna tikah Mizoram le khuate ah kan zam than ne lai maw tiin vansang a aumi an tampi lai.Nunnak tiang a thapmi pasaltha nan si caah nan thil tuahmi cung ah hohmanh nih mawhchiat le soisel ngam ding cu nan si bak lo, nain khuachung i kah cu kan hrial piak hram ko u timi hi nulepa tampi an phuan ngam lomi biacah a si.

Ralkap cu uihrut bantuk an si caah kah an ton caan poah ah mizapi lakah meithal le bomb kah khi thlachiat an ruat bal lo, khuachung nan kah hna caan ah a ingtuar tu taktak cu kanmah miphun lila kan si tawn. Thantlang bantuk in Hakha a ciam dih ve sual lai timi zong phan a um.

Mizapi um lonak Timit le Thantlang ah MAH ralkap an tam tuk ko caah zalawng tein anmah pawl khi kan tei piak hmasa ta ko u law, nan tei hna tikah Hakha ummi ralkap zong a herh ning in nan rak thuat ve te hna lai, cutik i a phunzaimi an um sual ahcun keimah hrim nih an cal ka kingh te hna lai.

Credit: Salai Lungthli Tum

Author: Salai Ephraim