A Tu Lio Chinram Kan Pastor Le Hruaitu Hna Cu Pastor Tiah Auh A Siloah Saya Tiah Kawh Auh Hna Lo Ah Cun

Kan theih cio bang, Kawlram leimi le Laimi pastor le Pathian riantuantu dang pawl cu pastor silole saya ti auh lo ahcun ninghngal le upat lo ah midang zong nih ruah a si i anmah lila zong nih upat lo ah an ruah i mi leh an duh lo, a lung a nuam lo, an thin a har. An min in auh nak in saya le pastor ti auh an duh deuh cang. Asinan mirang pastor le Bible sianginn ah ca chimtu professor pawl cu an min lawng tein auh an si/an duh deuh.

Anmah zongnih ka min tein ka au ko uh an ti. An min hmai ah “Sir” le “Professor” ti telh zong an ngen hlei lo. Email kuat le i chawnhbiak zongah an min te auh an duh deuh. Anmah tuk hmanh nih “Sir” tiah an kan auh can a um. Anmin lawng tein kan auh ko hna, pastor le professor pawl zong. Kawlram lei le Laimi Pathian riantuantu pawl zongnih rumra nei ngai i i umter le saya le pastor ti auh kan duh tukmi zonghi kan kaltak pah a hau cang tiah ka ruah.

Aruang cu Pathian riantuantu nih cun toidornak lungthin neih hi a biapi tuk i an member le an sianghngakchia ca zongah sia a rem lo pin ah thleidannak a langhter tu pakhat a si ve tiah ka ruah. Nunphung a khat lo tiah kan ti ko lai nan mirang lak zongah i upatnak a um ve thiam2 ko, i auhnak le i chawnh biak tik zongah.

Kan min nak in saya ti auh le pastor ti auh, kan duh deuhmi nih a sawh duhmi cu kan lungput a bi tuk, i uahnak a umter, keimah ka sang deuh ti le thinlung uaknak a langhter pin ah a hran tein thleidanmi (a thiang deuhmi) ka si tinak zong a langhter fawn. Pastor le saya ti auh lo zongah pastor le saya na sinak zong a tlau hlei lo i saya le pastor cu na si tho2 ko cu mu. Farasi le Sadusi pawl uarci deuh a si rua ka ti ka palh lo ahcun.

Credit:Van Tum

Author: Salai Ephraim