A Tu Lio Kawlram Kan Dohthlennak Cu Cepa Na Duh Le Ce Pa Varit Na Duh Le Cepa Ti Kan Si Ko

Burma Act Le Khuapau Dohthlennak.Burma Act timi cu Burma Unified through Rigorous Military Accountability Act of 2021 kha a tawinak in an auhmi a si. Hi Burma Act cu National Defense Authorization Act of 2023 (NDAA) ah telh a si i Dec 7, 2022 ah US House of Representatives nih an fehter. Cun Dec 15, 2022 ah US Senate nih an fehter ṭhan. US President nih min a thut lai i a hnubik remhmi NDAA of 2023 cu a nung cang lai. NDAA ah Burma Act cu telh a si caah US Cozah nih khuapau dohthlennak ah bawmhnak a pek cang lai.

Aho Thawngin Dah A Si?US House of Representatives ah Burma Act a chuahpitu hi New York in House Of Representatives a simi Gregory Weldon Meeks a si. A nih hi upadi thiamsang (lawyer) le ramkhel thiamsang a si. Kum 1998 in House of Representatives ah New York palai a si cang. Kum 2021 in atu tiang is House Committee on Foreign Affairs ah chairman a ṭuan. Democratic Party chungtel a si.Meeks nih cun “US hlutdaw nih Burma Act an fehtermi cu zaukphung hmuh khawh nakdingah ral a domi Myanmar rammi vialte hna caah hlawhtlinnak nganpi a si bantukin mithat lainawng SAC nih an thiltuahmi kongah ṭuanvo lakternak ding karlamh pakhat a si” tiah a chim.Burma Act kong biatak tein aupi cio dingin forfialnak a tuahtu Michael Haack nih US hlutdaw nih Burma Act an fehternak dingah a cawlcangmi cu US um Myanmar rammi hna le a bik in Chin miphun an si tiah a chim ve.

Burma Advocacy Group, Burma Refugee Commission, American Baptist International Ministries (IM), American Baptist Home Mission Societies (ABHMS), Regional Executive Ministers Council (REMC) le MMBB Financial Services (MMBB) hna zong Burma Act kongah a cawlcang ngaimi an si.Cun pumpak in Burma Advocacy Group le Grassroots Movement for Burma ah hruaitu pakhat a simi Pu Van Lian Kio, Peace and Justice Committee, CBCUSA Secretary Rev. Henry Van Ceu Lian, Chin Association of Maryland Excutive Director Pu Zo Tum Hmung, Calvary Burmese Church, Washington D.C. ah Senior Pastor le Karen Baptist Churches USA ah GS a simi Rev. Saw Ler Htoo hna hi rethei ngai in a cawlcangmi an si ve.Khrihfabu, zatlangbu le pumpak hna an i zuamnak thawngin Burma Act cu US hlutdaw pahnih (House of Representatives le Senate) nih an fehter hi a si.

Burma Act Ah Zeidah An Um?Burma Act cu a tawifiannak cun Myanmar ram ah dohthlennak a tuahtu hna bawmh ding le hramhram in nawlngeihnak a latu SAC dantat phihkharnak upadi a si. Dr. Thun Myint (Associate Professor, Carleton College, US) nih Burma Act kong a chimmi hi a tling ngai.Burmat Act chungah tlangcung hriamtlaibu (EAOs) le PDF hna kha fimthiamnak lei ah bawmh ding ti aa tel. Mithahnak hriamnam dah ti lo a dang a herhmi vialte cawnpiak le chimh an si lai. I runvennak, ngandamnak le fimthiamnak pin ah a dangdang bawmh ding zong tampi an um.Minung hawi zawnruah bawmhnak, sii lei bawmhnak, ramchung ralhrial pawl bawmhnak le ramleng a zammi/a phanmi Myanmar mi hna bawmh ding tianginn aa tel. SAC dantat phihkharnak kong zong fiang tein an telh.Burma Act chungah SAC le Myanmar ralkapbu cu ralhrangbu pakhat bantuk tiangin a langhter. A biafang cun an hmang lo nain hi upadi nih aa timhmi zoh tikah US cozah nih SAC cu ralhrangbu pakhat bantukin a hmuh cang ti a fiang. SAC sinah zei ram hmanh nih ral hriamnam zuarh lo ding timi zong aa tel. A sullam cu hi upadi nih SAC cu phunglam a ngei lomi, ruru hranghrang in a nungmi le minung lungthin a keng ti lomi misualbu bantukin a chiah cang.

Biakilh:Burma Act cu President nih minthut lawng a taang cang. House le Senate nih an fehter cangmi cu President zong min a thut lai ti a fiang ko. Hi upadi ning tein US cozah nih NUG, EAOs le PDF pawl a bawmh hna a si ahcun khuapau dohthlennak muihmai tampi aa thleng ko lai. Hriamnam bawmh ding ti a um lo nain zeidang a bawmhmi nih dohthlennak tuanbia thar an ṭial te lai timi ruahchannak ka ngei.

The Chin Post Weekly Journal
By. Salai CP Lian

Author: Salai Ephraim