AA Ralkapbu Nih Ningcang Lo In Miram Le Mi Hmun A Eihmuar Mi Kongah UK Palai Pawl An Thinphan An Celh Ti Loh

Minpia Rohingya khua AA Nih An Chuh Hna.Rakhine ramkulh Minpia peng Rohingya pawl umnak Letma khua cu AA nih July 24 ah khan an chuh hna i,hmun an khuar caah kan thin a phan ngai tiah Burma Campaign UK nih cathanh a chuah.AA nih Rohingya khua an lak mi kong he pehtlaih in Burma Campaign UK nih AA ralkap 300 hrawng cu July 24 in an luhhnawh hna i sa, caw vun le innkhat ah 15,000 cio phaisa an kholh hna tiah theih a si i, Khuami cheukhat hna cu cozah sin ah ngunkhuai an pek peng caah AA sin phaisa pek ding hi an al tiah theih a si.

Atu bantukin phaisa a pe duh lo mi khuami 12 hna cu AA nih an tlaih hna i rawl lo, ti lo in an chiah hna caah a nu an tlaih piak mi ngakchia thla 1 mi cu nikhua theih lo a um tiah Burma campaign UK nih a chim.AA nih khuami satil, arva hna zong an fir piak hna pin ah khuami hna cu AA nih zeihmanh kan cungah sualnak a tuah lo tiin min an thut ter tiah theih a si.

AA bawizik Maj.Gen. Htun Mya Naing nih biaknak a khat lo mi, miphun dang hna cungah theihthiamnak kan ngei ko nain, ralhrangbu le sualnak a ngeimi hna cu kan kham kho hna lo. Biadik lo mi an chim a si ahcun hawikom si nak in ral ah a cang kho caah nan i ralrin ka duh tiah amah twitter ah a tial tiah Burma campaign UK nih a langhter.

Burma campaign UK nih AA cu mah khua chuahtak ding le khuami hna fahnak le thih nak, nuhrin covo buar nak tuah lo dingin a nawl.

Ref; Burma Campaign UK