America Cozah Le South Korea Nih Kawlram Mipi Caah Vawlei Cung Hruaitu Hna Sin Ah Tlang An Au Cang

American le South Korea biapi tonnak an ngeih dih, May 21 ah ramhnih fonh in cathanh an chuahmi chung ah American President Joe Biden le South Korea President Yoon Suk-yeol nih Myanmar rammi bawmh ding in ramkip sinah bawmh an hal. Cu pinah SAC ralkap hriamnam zuarh lo dingin an hal, tiah RFA nih a langhter.

SAC ralkap nih Myanmar rammi cungah thah nawnnak a tuah mi ngol ding, ramkhel thongtla an dihlak chuah ding, ralzam mi hna zeitik paoh ah bawmh khawhnak nawl pek ding le Democracy phung a thar in ser ṭhan dingah American le South Korea nih cun an cathanh ah an langhter.

“Myanmar Democracy a dir pitu American le South Korea President hna nih, tonbiaruahnak an ngeihmi ah Myanmar ram kong an ceih ko nain a taktak in langhter hna sehlaw a ṭha tuk hnga!” tiah Yangon hrambunh ramkhel kong hlathlaitu pakhat nih a chim.

“Myanmar ram kong hi cu a buai bikmi issue pakhat a si. Kaa in chim le cathanh sawhsawh lawng cun a za hrimhrim lo. A tak in tuahsernak a si hrimhrim lo,” tiah a chimchap.American President Joe Biden cu May 20-22 tiang South Korea ram ah a tlawng i atu hi Japan ram a phan, tiah theih a si.

Credit: The Chin Post

Author: Salai Ephraim