America Nih Japan Sin Ah Anti Ballistic Missile Zuar A Timh Mi Cu North Korea Caah Tahchuak Bak A Si Ko Lai

America nih hriamnam a ngeih mi hna lak ah anti-ballistic missile cu Japan sin ah US dollar 3.3 million in zuar a timh.hi konghe pehtlai in China nih ka khat hmanh a holh ngam ti lo.Pentagon nih thawngthanhnak a tuah ningah cun America nih Japan sin ah anti-ballistic missile zuar a timh mi hi ship board Aegis system in duh tawk in hman khawh mi a si lai.Japan nih a mah le mah a humhim nak ding caah zuar dingin biachahnak tuah mi a si tiah a chim.

 

Cun,hi anti-ballistic missile cu Raytheon company nih a ser mi a si i Japan ram rawh duh le kah duh ah Japan ram chungah hriamnam a rak zuang mi hna cu anti-ballistic missile nih hin fawi tein a rak kah thlak khawh hna lai tiah a chim.a bik in hi anti-ballistic missile cu midang he i huat nak le i doh nak caah si lo in Japan nih a mah le a mah a humhim nak ding ca lawngah a hman lai tiah a chim fawn.

 

North Korea nih August thla chungah a hriamnam ngeih mi a uan ngaingai mi hna short-range ballistic missile pawl hna cu pa 7 bak hneksak nak a tuah cang na in hi hneksak nak a tuah mi short-range ballistic missile 7 chungah an ram inn pa a si mi Japan ram a phan kho mi pakhat hmanh an um loh.asinain a tutan i America hriamnam anti-ballistic missile Japan nih a cawk dingmi hi cu a let bak in a cat mi a si tiah an chim.

 

Cun, America Japan sin ah hi hriamnam zuar a timh mi ruangah Hungary, South Korea, Lithuania le Denmark ram sin zongah hriamnam dangdang zuar dingin biachahnak a tuah.America nih Hungary, South Korea, Lithuania le Denmark hna sin ah hriamnam zuar a timh mi hi a min cu an chim langh lo na in a dih lak man ah UD dollar 943 million tluk man an si lai tiah an chim.cun a dih lak in Raytheon company nih a ser mi lawngte an si tiah an chim.

Source: BBC

Author: Salai Ephraim