American Cozah Nih A Rian Tuanti Hawi NATO Ram Pawl Humhim Nak Ah Hriamnam A Ser Rungah Russia Puah A Tim Than Hoi

American cozah nih cun a rian t’uantu hawi NATO chungtel ram vialte ven nak caah le humhimnak caah ti in southeastern European ram chung ah a um mi Romania ram ah “Missile Defense Shield Interceptor” hriamnam t’ihnung taktak mi cu a chiah.cun, American nih Romania ram chungah a chiah mi Missile Defense Shield Interceptor nih hin ramdang mi nih an neih mi hriamnam t’ihnung (short & medium long range ballistic missile) pawl hna cu fawi tein a rak kham khawh dih tiah an chim.

Hi konghe pehtlai in Russia Prime Minister Dmitry Medvedev nih cun American cozah nih hi thil a tuah mi cu a rian t’uanti hawi NATO chung tel ram vialte humhim a duh ruangah a tuah mi a si lo i, American nih Russia ram ngiat thli/kher hlai a timh biatu a si deuh tiah a chim.cu pin ah Russia Foreign Ministry Mikhail Ulynenov zong nih American nih mah bantuk thil a tuahmi hi thil t’halo taktak a si i,thil t’ha ka tuah a ti lio ah thil t’ha nak in thil t’halo nih a pehzulh te lai tiah a chim.

Asinain American Asst Secretary of State Frank Rose nih cun hi thil kan tuah mi hi American nih ral ser kan duh ruangah a si lo i,NATO chungtel ram vialte chungah remdaihnak le humhim tein an t’hut dir khawh nak ding caah sermi a si i,NATO chungtel ram vialte chungah t’ihnung hriamnam a lut dingmi hna cu fawi tein “Missile Defense Shield Interceptor”nih a kham piak khawh hna lai.a mah belte hi hriamnam nih hin Nuclear hriamnam cu a kham kho lai lo tiah a chim.

Cun, a ra lai mi kum 2020 chungah khin NATO chungtel Poland ram zongah “Missile Defense Shield Interceptor” hriamnam cu chiah a si t’han te lai tiah a chim fawn.American nih a tutan ah “Missile Defense Shield Interceptor”a ser nak ah hin $ 800 million a dih pin ah kum 2013 lio khan ser hram a rak i thok i a rian t’uanti hawi le NATO chungtel ram 28 bak veng kho dingin a ser mi a si tiah an chim.

Source: BBC