American President Trump Nih Mexico Cozah Cu A Tei Khawh Than Caah Mipem Le Ralzam Cu An Tap Lai

Nai teah Mexico cozah le Trump karlak thil um tu ning kha kan rak langhter cang i.Trump nih UK le France ram a va tlawn nak ah reporter pawl hna nih interview an rak tuah i cu lio ah cun Trump nih cun Mexico cozah nih US cozah duhnak cu zei ah an rello i an mah duh paoh in an ram chungah mipem le ralzam pawl hna cu a umter hna pin ah a ram chungah a umter mi hna mipem le ralzam pawl hna cu US ram chung an luh khawh nak ding caah lam a kawl piak hna.

Cu caah Mexico cozah nih a ram chung thil chuak US ram chungah a luhter man hna cu US cozah nih June 10 hnu cun thlakhat hnu thlak in ngunkhuai man cu 5% tluk in kan lak peng lai tiah a chim.asinain Trump nih cu bantuk bia a chim mi cu Mexico cozah nih an t’ih caah US cozah he remdaihnak ser dingin thawngthanhnak an tuah tik ah Trump nih Mexico cozah le US cozah karlak thil um tu ning cu a rauh hlan ah State Department nih thawnhzamhnak an tuah zau lai tiah a rak chim.

Cu hnu ah Trump nih tuchun ah hi ti’n a chim,”Mexico cozah nih cu hlan i mipem le ralzam hna kongah policy a rak hman mi hna cu pehzulh lo ding in le US cozah duh ningin rian t’uan dingah biakam nak an tuah caah US nih ngun khuai lak dingin biachahnak a tuah cang mi cu lak t’han lo ding an si lai”tiah a chim.cu caah Mexico nih ramri ah a chiah mi hna a ralkap pawl hna cu ramri vengtu hna bawmtu dingin a ralkap zei maw zat chiah t’han dingin biachahnak a tuah tiah a chim.

 

Mexican Foreign Minister Marcelo Ebrard nih cun US cozah nih hi tibantuk in remdaihnak tuahpi an kan duh lai ti hi kan ruahmi a si lo na in kan i ruahlo leng in US nih innka kaupi in an rak kan awnh mi le remdaihnak an kan serpi mi cu kan i lawm tuk tiah a chim.cun Trump nih Mexico cozah cungah ngunkhuai lak a timh mi cu Republican hruaitu pawl hna nih Senate ah biatak tein doh an vun timh i Republican hruaitu pawl hna nih timhlamhnak an tuah cuahmah lio ah White House nih a tu bantuk in thawngzamhnak a tuah hi a si tiah an chim.

 

Source: CNN