American President Trump Nih Mexico Ram Hrem A Timh Ning Cu Dah Ngai A Poi Taktak

American le Mexico ramri ah hmawngkhu ralzam pawl hna cu an karh chin leng mang caah le Mexico cozah nih Trump i a chim ningin rian an t’uan duhlo caah Trump nih cun Mexico ram cu biatak tein hrem a timh i,Mexico ram in US ram chungah an thil luhter man cu 5% tluk bak in a man lak t’han a timh rih hna tiah an chim.

Trump nih cun Mexico cozah cu US ram chungah ningcanglo in luh a tim mi hmawngkhu ralzam pawl hna cu na ram in rak kham hna law,rak kirter hna tiah a chim.cun ka chim bantuk in Mexico cozah nih na tuahlo a si ah cun US nih na sin ah bawmhchanhnak a tuah mi vialte hna zong ka phih dih lai tiah fak taktak in an rak chimh bal cang hna.

 

Cun Trump nih Mexico cozah cungah a tu bantuk in thil tuah a timh mi konghe pehtlai in ramdang mi hna nih cun Trump nih Mexico cozah cungah a duh tawk in hremnak tuah hna hmanh sehlaw,mah nih cun ralzam kongah zei hmanh san tlaimi a si lai lo.Mexico ram mipi hna caah harsatnak a pek hna menmen a si ko lai tiah an chim.

Cun White House Chief of Staff Mick Mulvany nih cun Trump nih mah bantuk in Mexico cozah cungah tuah dingin biachahnak a tuah t’hanmi hi Mexico ram i chirhchan in ralzam tampi hna cu US ram chungah an lut i US ram chungah thil t’halo tampi an chuahter caah US ram a him khawh nak ding caah Trump nih a tuahmi a si tiah a chim.cun a tu ah Mexico ram chungah a um mi hmawngkhu ralzam pawl hna cu minung 100,000 hrawng an um rih i US luh khawh nak ding lam an kawl cuahmah peng rih tiah Homeland Security Kevin McAleena nih a chim.

Source: CNN