CDF Mindat dihlak hriamnam chiahter in ralhrang sin ah fonh ding in mipi hna cu SAC nih a fial

Mindat khuapi chung ah CDF hna an hriamnam chiahter i kan sin ah rak i fonh hna seh tiah SAC ralhrang nih mipi cu fialnak le forhnak bia a ruah hna tiah theih a si,Atu bantuk in fialnak le forhnak an tuah hi Mindat khuapi chung RC biakinn pawngkam ah mipi an auh hna i tonpumhnak an tuah.

Hi an tuahnak kong he pehtlai in min langhter duh lo tonpumhnak ah aa tel mi pakhat nih, “RC biakinn pawng ah mipi an kan auh i mipi zong kan tam ngai. Abik in an kan fial mi le an kan forh mi cu CDF hna nih an hriamnam chia in anmah lei ah i fonh ding hi a si. CDF nih an hriamnam chia hna sehlaw kan lei ah i fonh hna seh tiah an kan chimhter hna. Kanmah lei nih zei kan let hna lo. A duh zong an duh ding le kan duh ding khi a si fawn lo,” tiah CCN ah a chim.

Cun atu bantuk in Mindat khuami an tonpumh ter hna nak ahhin CDF an mah ah i fonh ding in mipi an fial hna lawng si loin khualtlung le mithar inn ah riahter lo le tlunter lo dingin ralhrang nih ralring an pek hna. Nan tlunter hna ahcun kan in tlaih hna lai tiah an tichap hna.

Credit: Chin Cable Network Channel

Author: Salai Ephraim