1830 ah khan Rochester, New York ah, Pathian nih khuaruahhar in a rak hmanmi, Charles Finney nih crusade a rak tuah. 30,000 an lung an i thleng (an hrinṭhan )A hnuah Charles Finney nih a chimmi cu, Zumhtlak pakhat nih biatak tein thla a camnak ruang ah a si a ti. A fiangmi cu, mah vialte minung nih khamhnak an co mi kha minung pakhat nih biatak tein thla a rak cam ruang ah a si i, a thlacamnak theipar a si.
1873 ah khan, Pathian nih khuaruahhar in a rak hmanmi, Dwight L. Moody nih London ah thawngṭha a rak chim i minung tampi, rel cawk lo an nunnak a tongh hna, an nun aa thleng.A hnuah D.L Moody nih a ruang a hun chim i: Mah vialte minung nih nun thlennak hrinṭhannak an co mi kha, a dam lo ruang ah ihkhun cungah a it pengmi nute nih a ihkhun cung ah biatak tein thla a rak camnak ruang ah a si, a ti.
Mah tluk in ṭhanghphawknak(revival) a rak tlunnak le rel cawk lo nih nun thlennak an rak hmuhnak kha mizaw nute nih a ihkhun cung in dong lo in biatak tein thla a rak camnak ruangah a rak si.Thlacam cu Pathian sinah thlaici kan tuh bantuk khi a si. Thlaici cu tuh lo ahcun a keu ding a um lo. Tuh lawng ah a keu. Na lung dong lai ci! Bawipa sinah thlacamnak thlaici kha tuh peng ko hna u sih. A caan a phanh tikah Bawipa nih a keuhter te ko lai. Thlarau lo ah tuh peng ko hna u sih.
Bible nih:Kei nih a ci ka tuh, Apollo nih a kung kha ti a toih, sihmanhsehlaw a ṭhantertu cu Pathian a si. 1 Korin 3:6 Nanmah le nanmah i hleng hlah u; ahohmanh nih Pathian cu an deh kho lo. Mi nih a tuhmi cu a zun ko lai. Galati 6:7
Credit: Abraham Ram Lian Khar
