Chin Hrinfa Rual Hna Kan I Hlumhnak Ram Le Vawlei Kha Chinland Cu A Si

Cu Lungput Chan khi Asi Cang! “Arbawm aa thlainak paohpaoh cu kan ram” tiah MNF movement nih a rak aupi. CNF zong nih “Chin State” ati bal lo, “Chinland” ati zungzal; Chin hrinfa rual hna kan hlumhnak ram le vawlei kha “Chinland” cu asi ko. Tuni Chin State cu 13,000 Square miles lawng a kau; Chinland cu 35,000 Square miles leeng a kau i, tuni vawleicung ram 85 nakin “Chinland” hi a kau i a lian deuh. Tuni ahcun Chinmi hna nih Chin State tiate lawng huap lungput neih cu a bi deuh cang. Nichuah nitlaak khuachaak khuathlang a huap khomi “Chinland” lungput pi neih chan kha asi cang.

Chin State um milu hi cu sing 4 leeng fai lawng kan si. Chinland milu hi cu nuai 9 leeng kan phan lai, tiah milu a hlathlaitu C. Lalremruat nih a ṭial. Tuni vawleicung ram le hmun (countries & areas) 233 chungah 140 cu Chinland milu nakin an tlawm deuh. Switzerland nakin Chin hrinfa milu zat hi a tam i, Denmark le Norway milu let 2 tluk deng khi asi. Tuni ahcun Chin State chung a ummi milu ca te lawng rianṭuan le khuaruah cu a bi deuh cang. Rawn um le tlang um Chinmi vialte lengah vawlei kili Chin hrinfa huap lungput in rianṭuan le khuaruah chan kha a hun si cang. Hi a cunglei laihritlai minung hna hi tuanphung hngal hna nih an min ah “Chin-Kuki-Mizo” timi min bawm chungah an kan khumh dih. Micheu nih “Chinlung chuak” tiah kan zapi khi an huapter. Duhlian holh hmang nih “Zofate asiloah Zohnahthlak” an kan ti.

 

Hi miphun dihlak zapi i hrawm khawhmi “Tlangholh” kha kan ngei hna lo. Holh phun kan rum ngaingai i phun 30 leeng kan ngei. Kan zapihuap caholh caah kanmah holh hi a ṭhabikcem i aa tlakbik timi (Contesting Lingua Franca and Common Language) icuhnak le i-alnak ah caan tam ngaingai a rak liam i cu nih tamtuk thil a rak hrawh tawn. Tuni ahcun Chinram um holh vialte hi kan holh dih an si hna timi lungput; Chin hrinfa poah nihcun a tlawmbik Chinram chung holh phun 3-5 tal cu kan ithiampiak i kan itheihpiak hrim a hau, timi lungput neih chan kha asi cang.Kan zapi a kan huap khomi “Miphun Min” pakhat kan ngei hna lo. Kum saupi kanmah kan min hi a dikbik i a ṭhabikcem tiah icuhnak le i-alnak (Contesting Nomenclatures) nih kan kar lakah fak ngaingai in thil a hrawh tawn.Tuni ahcun Zo le Lai lungput ngei cu khuaruat kho deuh lomi ah chiah an si cang i, Zomi le Laimi min bak lawnglawng dirpi duhnak lungput cu a ruatṭhing i a bi deuhmi lungput ah hmuh an si deuh cang lengah Mizo min bakbak lawng dirpi duhnak lungput zong chan a doi kho deuh ti lomi lungput ah chiah deuh khi asi cang.

1896 Chin Hills Regulation upadi (hnuah Chin Special Division Act 1948) nih Chin timi cu (a) Lushais, (b) Kukis, (c) Nagas, (d) Burmans domiciles in Chin Hills and the Chins of adjoining areas, tiah a hrilfiah. Hi upadi chung a cuangmi hi a hraam a fekbikmi Chin sullam hrilhfiahnak cu asi rih.Cu tluk cun Chin timi hi a huap-kau i a khuhmi khi a lian.Tuni ahcun Bawm ram zong ka ram, Zogam zong ka ram, Lairam zong ka ram, Zoram zong ka ram asi i, Chinram zong hi ka ram dih asi timi lungput. Kuki zong Chin, Chin zong Naga, Lushai (Mizo) zong hi Chin, timi lungput. Zofa zong ka si, Kuki zong ka si, Laifa zong ka si i, Chinfa zong ka si, timi lungput neih chan kha asi cang. Umnak hmunhma cio in min phunphun kan ngei hna nain “miphun pakhat, thisa khat, hrinkhat unau bak kan si” timi thisa lungput neih chan kha asi cang i hi vialte min zongzai kan ngeihmi hna hi kan min dih an si, tiah i pompiak, i upatpiak le i cohlanpiak chan kha asi cang.

Minung rincop ramri (artificial boundary) nih ri kan thler chung rih hmanhsehlaw unau hna thinlung ramah ramri aa kham bal lo; ramri thlertu Bawinu tiva le Tio tiva nakin unau sinak thisen hi a chah deuh “blood is thicker than water” timi lungput neih chan kha asi cang.Hi bantuk khuachhak khuathlang nichuah nitlaak, rawn le tlangpar um Chinmi vialte a huap khomi lungput neih leiah a tlik in tlik izuam awk asi lioah Falam le Hakha tbk hrawnghrang hrik hna a hun vah ṭheo hin cun mi a simh tuk!!Halkha Khualipi cu Laiholh hmang ta bik deuh lawngin ruahnak bite (Lainization or Hakhanism) lungput kengin kan Khualipi ah Laiholh a thiam lomi Chin hrinfa dang hna phun dang deuhin zohnak le thleinak a um khin cun duh a nung lo ngai i a poi tuk!! Kan Jerusalem ahhin hnulei samtom maw hmailei samtom bik ti um hlah seh;

Hebrew holh, Arabic holh, Yiddish thlu lo, English thlu lo, Amharic thlu lo holhkip hmang nih himnuam tein tlawnleen an duhnak pangpar dumpi bantuk sisehlaw Judahmi zong Jentalmi zong Farasimi thlu lo, Sadusimi thlu loin nuam tein khua an sak duhnak le umṭhut an duhnak Khualipi ah cang tuah seh!!Kan tlang a san bantuk in kan cuanhning hmathlir hi sang ve seh; kan horkuang a thuh bantuk in kan khuaruahning thuk tuah seh; kan ram a kau bantuk in kan lungput hi kau ve seh, kan tiva le thli a thian bantuk in kan thinlung hi thiang ve sehlaw kan Chinram tlangcung pangpar hna aa dawh bantuk hin kan nunnung zong idawh ve tuah seh!!
Chinram cu Chinmi kan ta zungzal kha a si lai.

Catialtu: Salai Van Lian Thang