Chin Mi NLD Le USDP Palai Ah Dir In Kan Miphun Covo Kan Or An Chim Khawh Lai Ti Cu Lih A Si

A luan cia mi elections (2010, 2015) hna lio ah Chin mi nih Chin party kan tanh ding asi, Chin party candidate mee (vote) kan pek ding asi tiin ka rak tialmi ah mi cheu nih comment an ka tuah mi ah: Kawl ram ah kan um chung (Independent kan khel lo chung) cu kan duh zong duh lo zong ah Kawl nih a kan uk ko lai, Chin party nih Chin ram a tei zong ah acoza a ser kho lai lo i Rawn ah teinak a hmu mi (NLD or USPD) ah a vai fonh ko ding asi (Ti va te cu tiva pi ah ai fonh ding thiamthiam asi) tiin an ti tawn.A ngaingai ti ahcun, Chin mi nih Kawl ram chung kan um mi hi Kawl mi nih a kan uk ding in kan um mi a si lo, a kan uk ding in an sin ah aa fonh mi kan si lo. Chin mi cu mah tein Chin ram uk ding le Kawl ram cu Kawl mi, Shan, Kachin hna he uk ti dingin Kawl ram a dirhtu/ aser tu kan si. (Self Rule & Share Rule).Self Rule le Share Rule cu Federal system asi i atu 2008 phunhram ning cun asi kholo, Federal kan ngah rihlo caah asi kho lo tiin mi tampi nih an chim/ an tial tawn.A ngaingai ti ahcun upadi (Phunhram) cu upadi asi i a hmangtu minung (nawl ngeitu) nih a mah caah a duh zawng in a hman khawh, a kuaih khawh.

 

 

 

 

 

 

 

 

 

 

Cu ruangah sihni (lawyer) a thiam deuh mi cu phaisa tampi in hlan an si tawn. Kawl pawl (NLD telh in) nih upadi cu anmah caah hoih in an rak hman tawn (2015 Rakhine state cozah sernak kong ah NLD nih 261 kha amah caah hoihin (KUEIH in) a hman ko.Phunhrampi remhkhawh rih lo lio zongah 2008 phunhram ningin Chin mi le Tlangcung mi nih nawl ngeihkhawh nak kan ngeih ko. Cucu zeidah asi? Tlangcung mi nih kan ngeih mi Palai hmun 207 hi a tam u (120 cunglei poh) kan ngah khawh ahcun Kawl ram ah acozah a sertu (Coalition Government) dirhmun kan si kho. Tlangcung ah kan mah Tlangcung mi nih MP atam u kan tei ahcun Kawl rawn ah atam bik a tei mi he coza serti khawh asi.Kawl rawn ah MP hmun 291 a um i a ho party hmanh nih a zapi an tei lai lo. NLD zong nih a tam bik ah 200-250 hrawn hi a tei kho men. Tlangcung mi kan lung a fim ahcun kan mah tel loin a ho Rawn party hmanh nih anmah lawng in acozah a ser kho lai lo (333 an ngah kho lai lo).

 

 

 

 

 

 

 

 

 

 

Cu cu kan mah kut ah a um mi asi ko. Cu tin Coalition cozah kan serti hna ahcun kan mah kan duh mi hal khawh (bargain tuah khawh) (Chin state coza ser ding le Kawl ram pi coza ah hmunhma ngeih ve khawh) asi. Kawl ram uk ve tu le mah ram (Chin ram) uk tu si khawh nak 2008 phinhram ningin a um ko. Cu cu Self Rule le Share Rule kan ti tawn mi Federal system ih a muru cu asi ko (a tlamtling mi Self determination asi lo zongah kan miphun nih nawl ngeihnak zeimawzat cu a um ko). Hi hi kan theih lo chung le kan fiang lo chung poh cu Kawl pawl nih a kan uk peng ko lai. Kan mah kut ah a um mi nawl ngeihnak kan ngeih ko mi kan fiang lo i, kan ram chung ah Kawl party (NLD, USPD) mee kan pek hna chung poh cu phunhrampi hi Federal phunhram a va si ko zongah Kawl mi nih thut dir (THAIN THAT = sit dawn, stand up) a kan tuahter thiamthiam ko lai.

 

 

 

 

 

 

 

 

 

 

NLD, USPD palai asi mi Chin mi nih party a chung lei in kan miphun kong le kan covo kong an chim khawh lai, miphun caah an dir lai timi hi asi kho lo mi asi. Hihi thil kal ning asi lo. Chin state i NLD upa hna le MP pawl cu NLD BAHO (Central hruaitu) hna he an rank an i thlau tuk. NLD palai an si bantukin NLD policy ningin an chim an rel ding te kha asi ko. NLD policy leng in an chim lai lo, NLD policy zong an thleng kho hlei lai lo.1947 Panglong lio le 1947 Constitution lio cu Tlangcung mi kan rak fim deuh rih lo caah Kawl mi nih an kan hlen kan ti ko lai nain, nihin ni tiang kan mah kut ah a um ko mi nawl ngeihnak hmanh kan hman thiam lo, kan i lak thiam lo, kan mah le kan mah i zumh loin Kawl mi kan zumh deuh, kan mah le kan mah zei hmanh kan tuah kho lai lo timi sal lungput kan ngeih rih peng ahcun Kawl kuttang ah a tang peng ding (sal si peng ding) miphun hrimhrim kan si ko.Edit a ka tuah piak tu ka nau Chan Khar cungah kalawm.

Kalawm,
Pa Hmun