Chin Miphun Cheukhat SIn Ca Kuat NLD Mp Hna Nih CRPH Cu An Mah Kut Tangah Chiah An Duh

Chin MP(hlun) cheukhat sin cakuat“MP cheukhat nih cun NUG hi CRPH [mi zapi theihfiannak in chim ah cun NLD mp tam deuh an i tel] tang ah chiah an duh. A ngai ngai ah cun NUG hi CRPH nih sermi phu a si lo, huap a kau deuhmi CDM, CRPH, Ramkhel party pawl, Tlangcung hriamtlai phu pawl, lamzawh committee pawl nih an sermi a si. Ramri ah an zaam nain nawlngeihnak hum an duh rih rua.”

A cung i ka hun ṭialmi bia hi Australia ram i khua a sami kan u (saya) pakhat nih a rak ka chimhmi bia a si. Ramri ah a zaammi Chin mp(hlun) cheukhat nih CDF kha PDF min in thlen ding in CDF pawl a lemsawitu MP pawl ka rak soisel hna lio i a chimmi a si. Chin MP hlun pawl,Thimnak tuah lai i thimfung lemsawinak nan tuah lio ah khan “Chin miphun le Chin ram ṭhanchonak tuah ding” le “cu rian a tlinkhawhnak hnga NLD party hi a ṭha bik tiah ka zumh caah hi party ah lut in thimnak ah kaa cuh venak a si” tiah nan rak chimmi bia kha nan philh cang maw?

Nai hrawng nan cawlcangh le nan awann zoh tik ah Chin ram le Chin miphun zawn nak in nanmah ṭhutden zawn a ruatmi nan lawh deuh ṭung?Nannih CRPH hi NUG a dirhtu nan si lo, NUG a dirhtu phu tampi hna lak i pakhat te lawng nan si hi nan philh sual maw? Ram le miphun zawn maw nan ruah deuh nanmah ṭhutden zawn dah?‘Caan karlak Chin miphun kongkau Ruahkhanṭinak Council’ (ICNCC) sersiamnak kong ah kannih thimmi MP pawl cu rian herh dang kan ngeih ruang ah a ra laimi biaruahnak ah kan i tel kho rih lai lo” tiah August 13 ni i ca nan chuahmi kha zei dah nan ruahnak a si?

Ming Awng Hlaing nih nawlngeihnak a laak hnu ah ramkhel party pakhat khat, asiloah hriamtlai phu pakhat khat pumpak cawlcanghnak in tei khawh a si lai lo, zapi ṭanrualnak thazaang a herh ti an i fian ruang ah cunglei nan upa pawl nih uknak chuh hlan an ruahnak tampi an thlen i NUG cozah an dirh hi nan i fiang maw?Uknak chuttu Min Aung Hlaing ralkap pawl hi zei tik ah kan tei hna lai ti zong ruahdamh awk a ṭhat rih lo lawng si lo in dothlennak aa thok kaa lawng a si tikhawhmi a tu lio ni le caan ah hin nan lungput le nan cawlcanghning hi faak deuh in hun i zoh ṭhan rih hmanh u. Chin ram le Chin miphun zawn maw biapi ah nan chiah deuh nanmah ṭhutden zawn dah?Mi zapi zawn nak in kanmah zawn kan ruah ko rih ah cun ‘sal rim’ kan nam zungzal ko lai!

Ruang Lian
22/08/2021