Chin Ralkap CDF Hna Nih An Biatung An Let Ruang Mang Cang

CDF NIH AN BIA AN LET RUANGAH PEHTLAINAK LAM PHIH A SI.Kan theihcia bang in 3rd Aug, 2022 ni i Young Lai Association Sub-Headquarters:Sangau khuakhannak in Lungpher South YLA nih Pu K.Lallungkham sin in Heroin No.4 an tlaihmi kongkau ah YLA Sub-Hqrs:Sangau nih cun tutiang ai pehtlaimi thil le Rithaisi an rak phurhnak a dothlat peng i, Myanmar lei in Pu K.Lallungkham sin i rak petu zong rak tlai ding in CDF pawl nawlpat an si i, CDF lei zong nih a herhning in an rak pehzulh ve fawn i an rak tlaih colh ve.

Hi hnu hin CDF lei he zong Phone-in i chawnhbiak peng a si i, YLA Sub-Hqrs:Sangau nih Myanmar lei in Pu K.Lallungkham rak petu sin in thil tampi theihhngalh duhmi le hal duhmi kan ngeih caah Pangkhua ah an tlaihmi pa kha rak ratpi in i tong ding in a liamcia nihnih thum in le nihin (Dt.8 Aug, 2022) tiang khan hnatlakṭinak kan ngei cang. Kan biachiahmi le hnatlak ṭinak te kha zul in nihin ah Pangkhua ah YLA Sub-Hqrs:Sangau Office Bearers pawl kan zuang hna.

Anmah lei zong nih Bungtlang tiang an rak ratpi ko hnu ah le YLA Sub-Hqrs:Sangau Office Bearers pawl nih zanlei 3:00PM tiang kan hngah hna hnu ah an bia an hun zuh ṭhan diam i, Tipi ah SYLA tu nih kan va ton hna lo ding a si cun an kir ṭhan lainak ding kong kha an kan van thanh ṭhan ceo. YLA Sub-Hqrs:Sangau nih a ṭhatremnak bik kawl in kan hnatlakṭi ning te kha kan zulh ko lio ah an bia an van thlen ṭhan diam hi Young Lai Association zei ah rel lo le i upat lo ah kan ruah i, an rak ratpi tik zong ah i tukden le i vuakvelh zong zeihmanh a um lai lo i bia kaahnih khat te lawng i hal a si lai tiin ṭhatein bia kan chiah hnu ah hitin rithaisii kan Lairam i van phurtu kongkau ah an bia an vun thlen ṭhanmi hi YLA Sub-Hqrs:Sangau cu a lungsi lo ngaingai.

Kan hmailei caan ah i theihthiam ṭinak le ṭhatremnak le ṭuanṭinak ṭha a um chinchin khawh nakhnga hnabeisei ruahchannak tampi he YLA Sub-Hqrs:Sangau nih cun kan i tlawnkainak Lam phihkhar rih siseh tiah Biakhiahnak a tuah i, Dt.9 Aug, 2022 thok in bianolh um hlan lo cu Myanmar le Mizoram lam phihkhar a si ti zapi kan i theihter. Cupinah Tipi ah Lawng zong hman khawh lo in a um lai ti kan i theihter fawn i, Cucaah kan Unau Myanmar lei i ummi le India lei i ummi nih a ruahzia nan kan thiampiak naklai le caan zeimaw chung cu nan rak kan theithiam hram naklai zaangfah kan in nawl hna.*

Credit: The Lairam Times

Author: Salai Ephraim