Chin Ralkulh chung Tedim peng chung khua mi pakhat cu SAC Ralhrang kamh mi bomh nih a puah hnawh

Chin ramkulh, Tedim peng, Laitui khuami pakhat cu ti lam ser ding in a kalnak lam ah August 8 ahkhan bomb hmanhmi i lamhsualnak in hliamhma tuar, tiah tualchung mi pakhat nih a chim.

Laitui khuami Salai Kam Za Hmung kum 40 cu fur caan ah a rawk lengmang mi an ti ratnak lam ser ding in a kal lio ah bomb i lamhsualnak in a kee ah hliam a tuar, tiah khuami pakhat nih a chim. Cu bomb cu mi zei phu nih an hmanhmi a si zong kan hngal lo, kan umnak lei ah cun kahdohnak zong um lo, tiah a chimchap.

Laitui khuami pakhat nih bomb aa lamhsualnak kong he pehtlai in SAC ralkap lei media, Fifty Two News nih cun, Sia kawl ah a kalmi khuami pakhat cu CDF nih an hmanhmi bomb aa lamh caah hliamhma tuar, tiah an thanh.

Laitui khua cu Tedim peng, inn 1000 hrawng umnak khua a si i, Laitui khuami nih bomb an i lamhsual hi a voihnihnak a si cang. A luancia July thla ah khan Sia a kawlmi pa pahnih cu bomb an i lamhsual caah pakhat cu a nunnak a liam i, pakhat cu a kee bul leng ah a mit zong a rak hliamh chih, tiah theih a si.

Credit: The Chin Post

Author: Salai Ephraim