Chin ramkulh Paletwa peng chungah i kahdohnak konghe pehtlai in Chin mi bak a si mi hna minung 10 hna cu tleih an si tik ah an chung le hna le an rualchan he hna zong i tong kho bak lo dingin biachahnak an tuah piak mi hna cu Khumi Affrairs Council nih August 30 ah khan nawlpetnak an tuah tiah theih a si.hi konghe pehtlai in Khumi Affrairs Council chairman U Kyaw Ngein nih a chim ningah cun kan nih Paletwa ramkulh chung um mipi hna nih cun kan tuar taktak cang.
Paletwa ramkulh chungah ni fati’n ti awk in i kah doh nak a um peng pin ah an duh tik paoh ah lam an kan phih thulh. kan phone line le internet tiang in an kan phih piak lengmang.a tutan zongah hi tibantuk in nawlpatnak kan tuah khawh mi hi zeidang ruang si lo in kan internet/phone line a t’hat bak in Yangon lei in statement kan chuah khawh caah a si tiah a chim.
Cun, Paletwa ram mi 10 hna kongah kan nih Khumi Affrairs Council pawl hna nih kan duh cem mi le kan i timh cem mi cu an cingla rualchan pawl hna he t’ha tein an i ton khawh nak hnga kan duh mi cu a si tiah a chim.cun a tu ah Chin mi 10 hna kongah nawlpatnak kan tuah chih mi hna cu kum 2018 lio ah khan Zatchawng khuami U Kho Lo le Ai Benjamin, Ai Kyaw Naing hna zong an rak tlau i a tu tiang hmuh khawh an si lo.
Cun,2019 ah khan an rak tleih mi Tantawn khuami U Kyaw Aye,Mrauk Oo khuami hna ca zongah a si.2019 July 16 ah khan Bawngwa khuami Ai Kyaw Lyn Naing le Ai Kyaw Sein,Ai Kyaw Kyaw Than,Ai Kyaw Lyn hna zong AA nih an tleih hna.2019 August 10 ah khan Namahda khua pawngah U Sa Beung an tleih i a tu tiang a si ning theih a si lo.
Angaingai tiah cun hi buaibainak hi CNF nih t’uahvo an lak awk cu a si.NCA minthut lio ah Chin ram chungah cun Kawl cozah ralkap le Chin ralkap hna lawng nih hriamnam i tleih in an um kho lai tiah biachahnak tuah a si tiah Dr. Sui Khar nih a rak chim bal cang.AA hriamtlai pawl hna nih kan mah ram chung lila ah ningcang lo in an um cawl hnawh mi cu CNF nih an tawlrel awk a si tiah U Kyaw Ngein nih a chim.
Credit: buannelnews
