Chin ramkulh ah a ummi Rawn Party pawl hi cu Chin issues kongah

2020 THIMNAK: ISSUE VOTING versus PARTY VOTING!Thimnak ah Issue voting vs. Party voting hi a um tawn. Mi tampi cu party an zoh theng lo, “issue” zohin mee an thla. Biana ah: Catholics tampi cu “pro-choice” ah siloin “pro-life” a dirpimi deuh poahah mee an thla. “Independence” a duhmi poah cu Scotland ahcun SNP party thengah mee an thla. “ Immigration issue” pakhatnak a chiami Chinmi bantuk nih Trump kuangah mee an sanh a har deuh ve ko lai. Cucu “issue” zohin a kalmi an si.Cun mi tampi cu party zohin mee an thla. Biana ah: Kawl miphun cu DASSK a umnak party kuang thengah mee an sanh deuh ko lai, “issue” kha an zohmi asi theng lo. Cun Kawl middle class nih Arakan Party kuangah mee an sanh ti hi a um tuk fawn lai lo. Cun Shans le Arakans kokek taktak nih Kawlmi dominated Party phunah mee an thla duh lem fawn lai lo. Bamar, Shans, Arakans miphun pawl hi “Kingdom Status” tiang a rak phan balmi an rak si i, an khuaruahning hi a pipa deuh, “inferior complex or low-self-esteem” an ngei lem hna lo. Cun Christian State aa timi Aizawl middle-class pawl nih: BJP kuangah mee thlak cu Hindutva (hegemony of Hindus or the Hindu way of Life) zumhnak a cohlangmi phunah an ruah ve i khuachia kuangah mee sanh tluk khin an ruah ve, BJP kuangah mee an sanh duh theng hna lo. USA ahcun “Red States” ah Trump nih campaign tuah a hauh theng lo bantukin “Blue States” ah Biden nih campaign tuah a hau theng ve lem lo. Hi pawl ahcun “Party-line voting” nak hmunhma pawl an si. Teinak biakhiaktu cu “swing states” asi caah cu hmun deuh lawngah mee leemsoinak zong cu an tuah caah “battleground states” ti zongin auh asi. Cu bantuk cun Party voting asiloah party-line vote in a kalmi hi thimnak ahcun a um ve tawn.

Kawlram thimnak a phak tikah Issue voting vs. Party voting timi lei siloin individual voting vs. party voting (pumpak maw party) ti deuhin bia hi a um pah tawn. Hihi ram tampi he kan idan deuhnak pakhat asi tawn i, kan no deuh rih caah ”issue” ngai a khelmi “level” kan phak rih lo asi hnga maw timi ruahawk khi a umter tawn. Pumpak maw Party timi biahalnak ka hmuhah Social Science cawnnakah social scientists hna nih fak ngaiin an i el tawnmi “Agency vs Structure Debate” khi lung a chuak tawn. Ngaingai ahcun: Electoral Democracy ahcun “pumpak maw party” timi hi a um kho ngaingai lo. Zeicatiah “pumpak” cu “party” cungah a um kho lo timi cu buu kalning le hruaining a fiang cangmi nih el awkah an rel ti lo mi thil asi. Pumpak nih party norms, party rules, party policy, party discipline cungin rian a ṭuan kho lo. Pumpak pakhat lawng nih cozah a ser kho lo. Pumpak pakhat lawng nih ram a uk kho fawn lo. Pumpak pakhat lawng nih upadi a tuah kho fawn lo.Democracy timi cu “aristocracy le dictatorial rule” uknak phun asi lo. Mi tlawmte uknak “oligarcy” asi fawn lo. Mirum mingan deuh uknak “pulutarchy le corporatocracy” zong asi lo. Pahrang ngei le a thiamhleimi uknak “meritocracy” zong asi lo. Democracy cu: mizapi uknak (government of the people by the people and for the people)kha asi.Ralkap Nahwahtah le Nahahphah cozah: Saw Maung le Than Swe chan bangin pumpak pakhat duhnak lawngin upadi zong an tuah i ram zong an uk bantuk ruahnak kha “pumpak” timi tiluan a hoihmi cu asi i cu nih kan khuaruahnak khi a chilh deuh rih caah asi hnga maw ti zong ruahawk a umter pah tawn. Phun dang cun: electoral politics ahcun pumpak cu “structure” tangah a ummi khi asi. Democrary ram ahcun “pumpak” cu chim lo; nawlngeihnak (sovereignty) hmanh kha cheuthum in an ṭhen: executive, judiciary, legislative tiah an cheumi kha asi. Kawlram hna ahcun: Tatmadaw a um rih i, cheuli ah an cheu, kan ti lai. Cucaah “pumpak maw party” timi hi cu Organizational Behavior le Parliamentary Procedure ṭha tein a lung a piang komi le buu hruainak kalning: Chain of Command le Span of Control timi a pemh komi nih cun el-awk a um lomi khi asi ko tiah ka ruah.

Khel dangin kan chim ahcun: thimnak ahcun issue voting vs. party voting timi tu hi ruahawk cu asi tawn.Kawlram thimnak a phakah kan “ issue” hi zeidah asi, timi hi ka ngiat tawn. Khatlei le khatlei ramkhel party pawl an i elmi le an inamnak “issue” hi a um tuk lem tawn lo. Election Manifestos pawl ka zoh i “Manifesto” zong a lo lem lomi khi a um len. Manifesto timi cu “ram le miphun caah a biapi deuh timi issue le priority kha chuahpiin zeitindah mah issue hi kan party nih kan ṭuanchuah deliver lai i, mipi le miphun ṭhanchonak caah santlaimi ah kan ṭuanchuah lai” tiah mipi nih cawk duh dingah policy izuar ding kha asi. Biana ah: tulio “Peace Process” kha “issue” ah kan chuahpi ahcun zeitindah NRPC structure le Peace Commission mandate te hna, technocrats le technical experts te hna le decision-making mechanism te hna hi reform kan tuah ṭhan lai, timi hna kha chuahpi a hei hau men hnga. Cu bantuk chuahpi ding ahcun problems identification, research institutes le academics pawl he “workshops & seminars” tete zong tampi tuah a hau men hnga.
2020 thimnak ah Kawlram pumpi level ahcun “IJC case le ICC case” te hna hi “issue” ngaingai asi awk cu asi. Hi bantuk “genocide case” hi Kawlram chanbia ah a um theng ti lai lo i vawlei tuanbia zongah a tlawmte. ICC le ICJ rulings hi vawlei chan a dongh hlan chung a bikin “International Law” a cawngmi nih Kawlram kha “reference” an hun tuahte lai. Vawlei tuanbia mit ahcun a ngan tukmi “issue” pakhat kan ton liopi khi asi. Nain, cu tluk a lianmi issue kong hna cu opposition parties pawl (eg. PPP le USDP bantuk) nih “election issue” ngaiah an chuahpi lem hna lo.

 

Cun Chin ramkulh level ahcun: Paletwa issue kong Security Issue te hna, tanghra sungh-on a chia bikmi sinak Education Reforms kong te hna, durable solutions for Chin IDPs kong te hna, eihmuar zikhnawh corruption a sangbik ramkulh kan simi te hna, delimitation and demarcation of State boundary kong te hna, ramleng Chin Expats Community kong te hna, Land governance kong te hna, Chin Customary Law kong te hna, Moral Reforms kong te hna, Child Mortality Rate a san tukmi kong tehna, Urban Planning kong te hna, Religious rights kong te hna, Below Poverty Line ah kan ummi te hna hi “Election Issues” an si awk khi asi. Hi issues ah hodah “policy and planning” a ṭha bikin a ngei timi kha “Party Election Manifesto” in izuar ding kha asi i, cucu hodah tlamtlinh ṭuanchuah “delivary” dingah ti khawhnak le thiamnak “capacity, competencies and skills” a ngei deuh timi “debate” awk zong khi asi. Cucu zoh hnain mipi nih thimfung sanh ding kha a kalning cu asi tawn. (Ramkomh issues cu a dang in um rih hnga).Nizan ah ruahlopiin Chin ralzam a kirmi 1300 cu awklokchong le sivang in Chin ramkulh ah harsatnak an tonmi thawngpang kan hmuh. Wow! ka ti. Hi bantuk issue hi cu a ngan tukmi, “State-level issue” hmanh khi asi ti lo, “Union-level issue” tiang khi phakpi a hun haumi asi. Thil fate in ruah-awk le zeihmanh loin rel phung kha asi lo. Hi ralzam a kirmi hna kong hi kan tawrel khawh hlan cu Chin ramkhel bualrawn ah an kongkau hi kan issue nganbik pakhat ah a cang thai lai. Tutan ah mah hna kong zong hi “Chin State election issue” nganmi pakhat ah khel a haumi pakhat khi asi. Ralzaam kir “repatriation” kong hi a luancia kum 2 ah ka rak ṭial bal. “Myanmar leiin repatiation khua a khangmi nan um hi ngakchia thei hmin rih lo lawh bantuk asi sual lai dakaw” tiah ka rak ti. Tutan ah vansanglam in an um thawng theih tikah lung a hun ṭha lo ngai.

 

Thil poi ngaimi cu: Chin ramkulh ah a ummi Rawn Party pawl hi cu Chin issues kongah “Election Manifesto” hmanh khi an ngei hna lo. Thimnak aa cuhmi nih rem maw rem loin pik le pakin pumpak in an au ciomi lawng asi tawn. Cu te hmanh cu zohin democracy ram tampi ahcun cozah tlaihter awkah thim-awk tlak an si hme maw tiah thim-awk cazin hmanhah an chia hna hnga maw ti khi ruahawk a um termi asi.2015 ahcun: Rawn ah NLD, Tlangram ah Tlangmi party tiah kan rak chim. Phundang cun: Issue voting siloin Party voting in kal hi a ṭha men lai, kan rak ti. Zeicatiah DASSK hrim nih ram uk ve tuah seh ti kha kan rak duh dih ciomi asi.Nain, kum 5 kan hun kal hnuah “performance” zohin tlawmte thil hun thlen hi a hun hau. Hi bantuk ahcun bia hi pumpak zoh loin “performance” zohin chah phung kha asi tawn.2020 ahcun: Rawn ah pumpak individual zohin mee hi i thla sehlaw Tlangram ahcun Tlangmi party theng zohin mee sanh hi a ṭha lo maw ti hi ka hmuhning cu asi. Phun dang cun: Rawn ah Issue Voting in kal cang usihlaw Tlangram ahcun kan dohthlennak a dih hlan le pupa hna rian hmaban kan lim hlan hi cu Party Voting in a kal rih hi a hau, ka tinak asi.

Salai Van Lian Thang
14 September 2020