Chin state cozah nih cun kum 3 chung rian an t’uan mi vialte hna cu July 10 ah khan Chin State zungpi ah zoht’han nak press conference an nei.asinain Chin State cozah nih kum 3 chung rian an t’uan nak konghe pehtlai in press conference tuah a si hlan ah hin Chin cozah nih kum 3 chung rian a t’uanmi konghe pehtlai in mipi nih biahalnak le theih nan duhmi a um a si ah cun a hlan kan tein hal khawh kan si lai tiah thawngthanhnak an tuah.press conference tuah nak ah cun, cu bantuk biahalnak pawl hna cu neih a si lai lo tiah an chim.
Chin State cozah nih a hlan kan in biahalnak tuah a si lai tiah thawng a thanh ruangah media tampi hna nih cun Chin State cozah nih media phung hram zei ah a rel lo pin ah press conference an tuah nak ah media theihter an duh lo bia a si tiah an soisel hna.cun press conference ah i tel dingin t’uanvo neitu tampi zong nih hi thil ruangah an itel pi duh hna loh tiah an chim.hi konghe pehtlai in Chin State Chief Minister Salai Lian Luai nih cun t’uanvo neitu lei in mipi sin ah a hlan kan in thawngthanh nak kan tuah mi a sullam cu,”an biahalnak le theih an duhmi vialte hna cu mipi sin ah felfai tein fianternak kan tuah khawh nak hnga ding caah le Department vialte kan rian t’uan ning felfai tein kan leh khawh hna nak caah”kan tuah mi a si a ti.
Cun, Chin State cozah lei in mipi le media pawl hna sin ah cu bantuk, kha bantuk bia hna cu nan hal kho lai lo tiah ramri kan khiah piak mi hna zei hmanh a um lo i,mipi nih an duh mi paoh cu zalong tein hal khawh nak caan kan pek ko hna tiah a chim.Chin a cozah nih kum 3 chung rian kan t’uan nak ah thil tampi ka tuah cia a um bantuk in tuah/t’uan dingah hma kan lak cuahmah mi hna zong tampi an um ve.cu thil vialte hna cu mipi sin ah an lung fiang lak in fianternak kan tuah khawh nak ding caah a si.hi thil kongah media zei rel lo nak le mipi zei rel lo nak a um lo tiah a chim.
Cun, hi press conference ah a tel ve mi The Chinland post Salai Bawi Uk Thang nih cun a tutan press conference cu a t’ha tuk ko na in a hlan kan in biahalnak tuah cia a si tik ah,Chin State cozah sin ah biahal dingin press conference ah a tel mi hna caah cun biahalnak caan a um ti lo.a hlan kan in an rak hal cia mi lawng an leh hna i,biahal dingin a rak itel mi,mipi tampi hna caah cun a caan an nei ti lo tiah a chim.cun, Media pawl hna zong nih a cozah kongah thawngzamh nak an tuah tik ah a cozah nih cun an mah doh/kalhtu ah an rel tawn hna.cu thil vialte tluang tein an um khawh nak ding caah cun media le a cozah rian t’uantu hna hi ton biaruahnak tuah kho leng mang hna sehlaw mah cu thil t’ha a si lai tiah a chim chap.
Credit: Free
