Chinram Matupi Khuapi Ralhrangbu Nih Dun Le Dan An Thlen Caah Mipi Caah Thinphang A Si Cang

Matupi um mi SAC ralkap pawl nih thlennawnnak an tuah ca ah khuami harnak tong Chin Ramkulh Matupi khua ah a um mi SAC ralkap pawl nih thlennawnnak an tuah i, mizapi he chawnhbiaknak ah dawnkhantu tete a um i khuami nih harsatnak an tong, tiah kan theih.

“Atu Matupi ah hrambunh in a um mi SAC ralkap ralkap le hmundang in ralkap pawl an riantuannak ah minung thlennawnnak an tuah tik ah kanmah nih kan thei ti hna lo. Mithar an si tik ah pehtlaihnak ah a buaithlak ngai, umkal le luhchuah ah harnak kan tong ngai,” tiah Matupi khuami pakhat nih The Hakha Times ah a chim.

Atu hi Matupi peng Phaneng khua, Lungtum khua hna ah ralkap pawl nih umhmun an khuar ruang ah Matupi peng in khuate hna nih dawrthil cawk ah Matupi an ra ti lo ti tluk a si cang. Matupi peng chaklei um mi khuate in Matupi ah a lut mi poh Phaneng khua ah an chek hna ca ah Kawl holh a chim thiam lo mi hna nih khualtlawn an tih cang pin ah misawhsawh zong nih khuatlawn ngam a si lo, tiah kan theih.

“Atu hi Lungtum khua sianginn ah ralkap pawl umhmun an khuar tiah kan theih. Zeitik tiang an um lai hngalh a si lo, khuami cu kan lungre a thei ko,” tiah Lungtum khuami pakhat nih The Hakha Times ah a chim.

Credit: Laica + The Hakha Times