Chinram kulh a si mi Paletwa ram kulh chungah AA hriamtlai pawl hna nih an mah duh paoh in hriamnam an hman mi le um hmun an khuar nak kongah kan zoh sawhsawh hna lo.AA pawl hna zong kan doh cuahmah ko hna.cu pin ah hi thil konghe pehtlai in Pyitawngsu Cozah sin zong ah a tu le a tu in kan chim phuan lengmang ko tiah Chin Ramkulh Cozah Ramri zohkhenhtu Minister Han Win Aung nih a chim.
Cun, Sep thla 14 ni ah Paletwa ram kulh chung minung naupawi tel in minung 5 an tlau t’han.cu a ltau mi hna kongah Pyitawngsu Cozah sin ah chim phuan nak zong kan ngei than rih tiah a chim.Cun, Paletwa ram kulh chung thil a cang mi vialte hna hi Pyitawngsu Cozah sin a tu le a tu in kan chim lengmang ko. Chin Ramkulh in t’uanvo ngeitu, a bik in anmah Paletwa ram kulh chungah ralkap zong tampi kan chiah piak hna tiah Minister Han Win Aung nih The Hakha Post sin ah a rak chim cang.
Minister Han Win Aung nih cun kei mah hi Chin miphun cu ka si lo nain Chinram ah rian ka t’uan bantuk in Chinmi ah kaa ruat. Ka rian bantuk in Chinram kilven cu ka daithlanh lai lo.ka rian a si caah Chinram a si mi Paletwa ram kulh chungah duh paoh in khuasak a tim mi AA hriamtlai pawl hna cu a si khawh chungin Kan doh peng hna lai. Cun, ral ruang ah ralzaam dirhmun in a um mi Paletwa khuami hna zong Chin Ramkulh Cozah budget in bawmhnak kan pek hna.
Cun, NGO le ramchung ramleng um mi hna zong nih an zuanhnawh ko hna. Ralzaam dirhmun in hartong an um tik ah kanmah leikap in dinhdorh le zohsawh kan tim hlei hna lo. A si khawh chung in kilven kan i tim ko,” tiah Chin Ramkulh Cozah Minister U Han Win Aung nih 2018 November 19, The Hakha Post ah a rak chim bal fawn.
Chinram kulh Paletwa thil a cangmi konghe pehtlai Minister Han Win Aung nih a mah hmurka te bak in a chim mi bia vun theih ah cun lung a hmui hringhran ko.Paletwa ramkulh chung thil a cangmi hna nih tuchun ni tiangah Khual tlawng lamlet ngamlo le mah inn lo hmanh ah um ngamlo in lunrethei taktak in khua an sa.Pyitawngsu Cozah zong nih biatak tein rian a t’uan lai tiah ruahchannak tampi a um ko.
