CNF CDF Mindat Le CDF Matupi In Minung Priat Nunnak Liam

July 23-25 ah Mindat peng chung le Matupi-Mindat karlak ah a cangmi CNF le CDF i bawm in SAC ralhrang he kahdohnak ah CNF le CDF lei in minung 8 an nunnak a liam, tiah Mindat mipi uknak lei bu nih thawngthanhnak ah an langhter.July 23 ah Mindat peng Yanpan khuate pawng ah CDF-Mindat le SAC ralhrang karlak kahdohnak a chuak i SAC ralhrang lei in minung 2 an thi i ralhrang tampi hliamhma an pu hna.SAC ralhrang pawl hnu lei ah an zaam i July 24 ah CDF-Mindat nih Shwe Twin Too khuate tiang an dawi hna.Asinain, SAC ralhrang thazaang chapmi pawl le CDF-Mindat cu Shwe Twin Too ah an i tong i kahdohnak a chuak tthan.

Shwe Twin Too kahdohnak ah SAC ralhrang lei a thimi le hliam a pumi an tam bang in CDF-Mindat lei in minung 4 an nunnak a liam ve. A nunnak a liammi hna cu: Salai Thang Ki Hung, Salai Thang Teik Mang, Salai Ha Om, Salai Bawi Mang Naing an si.Cun, July 24 ah Matupi lei in a rak ttummi SAC ralhrang pawl cu Sih-wanu timi khuate pawng ah CNF, CDF-Mindat le CDF-Matupi he an i kap hna.

Sih-wanu khuate pawng kahdohnak ah CDF-Matupi in minung pakhat a nunnak a liam i, CNF lei in minung 3 an nunnak a liam, tiah Mindat mipi uknak lei bu nih nihin (July 30) ah thawngpang an chuah.CNF in minung 3 an nunnak a liam timi kong ah CNF lei nih fehternak a um rih lo.CNF in Runno Phun Thang Hnin cu July 24 kaddohnak ah a nunnak a liam, tiah CNF nih ngaihchiatnak ca an chuahmi a um.

Asinain, a dang CNF ralkap pahnih thih le thih lo kong ah CNF nih official in an chuahmi a um lo bang in The Chin Journal zong nih kan fehter kho lo.July 27-29, ni thum chung zong ah CNF le CDF i bawm in SAC ralhrang he kahdohnak pehzul in a um i, SAC ralhrang lei in minung 14 an thi.July 27 ah Mindat-Kanpetlet karlak ah CDF-Mindat le CDF-Kanpetlet i bawm in SAC ralhrang he kahdohnak a um i, SAC ralrhrang lei in a tlawm bik minung 10 an thi, tiah CDF lei in mithi le hliampu an um lo.

Cun, July 29 ah Mindat-Matupi karlak mengtung no. 74 zawn ah CNF, CDF-Mindat le CDF-Matupi i bawm in SAC ralhrang he kahdohnak a cuak tthan.Mengtung no. 74 kahdohnak ah CDF-Matupi in minung 3 an nunnak a liam. SAC ralhrang lei in minung 4 an thi i, hliamhma a pumi an tampi.July 30 zaanlei sml. 2:00 hrawng ah Mindat-Matupi kar mengtung no. 76 ah i kahnak a um tthan nain a thimi le hliam a pumi konglam fiang in theih a si rih lo.

Credit: The Chin Journal