Chin Party Nih zeidah An Tuah Khawh Lai Ti Mi Bia Cu Mit Cawk Nak Hrampi A Si. Hi Bantuk Bia Hi Chim Ti Hlah U Sih Tiah Kan Nawl Hna.Kawl pawl cu an rak fim tuk. Chin miphun tuanbia an theih. Chin miphun minung tampi nih Kawl ralkap ah an luh ve. A luh mi pawl nih an kan chimh ton mi bia cu ral kan doh ah hin meithal a puak bak In Kawl ralkap pawl cu vawlei ah an bawk bak In an mit an i chinh. Cu bu cun meithal an puak thluamah ve, tiah an kan chimh. Asi nain tlangcung mi Kawl ralkap ah a um mi cu kan ral a tha. Kan kut a din tiah an kan chim ton. Cutikah Kawl ral bawi pawl nih an kan ttih ngaingai tiah an kan chim.
Cuti a si caah Kawl pawl nih hin Chin miphun an lung aa rual i an kut ah uknak a phan sual a si ah cun an kan tei lai ti mi an phan tuk caah divided and rule an hmang lengmang nak a si. Ci le Ci karlak ah remh lonak thlaici le ahua ha lo mi thil pakhat khat i cuh hna seh tiah saruh a kan hlonh hnawh ton nak a si. Chin miphun lungrual nak cu Kawl uknak ttha lo pawl nih an ttih tuk mi a si. Kan thil tuah khawh mi hi a hme te lo. Minung an si ve. Kut le ke, mit le hna, thin le lung, thluak le tuah tam nak an ngei ve ti kha an I fiang.
Cu lawng cu a si lo. USA pi hmanh nih hin a ram chung ah a luh ding ram dang mi pawl hi a kan ttih tuk. Cathiam lo, min ttial thiam lo, zei theih lo le zei hngalh lo si ko hmanh u sih, an ram chung van luh tikah cun hmailei ah an tthancho lai, an thiam can a phan ve lai, an hngalh can a phan ve lai, an fim can a phan ve lai, kut an ngei, ke an ngei, mit an ngei. Hna an ngei, tuah tan nak thluak le Lung an ngei ti an theih caah ram hnih nak ah an dirh/chiah mi Embassy ah ttha tein an kan check, interview an kan tuah.
Communist pawl he pehtlaih nak na ngei bal maw? Lai na nawng bal maw? Business zei bantuk pawl dah na tuah ton?Sianginn tang zeizat tiang na cawn/kai. Kut zuun thiam mi na ngei el maw? ti bantuk pawl ttha tein an kan hal dih cikcek. An kan hal dih cikcek hnu ah hi nu/pa hi kan ram ah luh a thiang an ti hnu lawngah an ram chung luh nak visa an kan pek. A sullam cu thil lian pi an tuah khawh ve, minung an si ve ti kha an theih. Cucaah a hlan kan In an i ralrin cia.
Chim duh mi cu minung pakhat nih tuah khawh mi a ngei ve ti kha mifim nih cun an hngalh i an theih i an tuah tan.Cutluk cun mifim nih hmailei thil kong kha a hlan kan In an ruah chunh khawh.Ziah! Kan nih Chin miphun cheu khat nih Chin Party nih zeidah an tuah khawh ti mi bia hi kan chim/tial le kan au hnga ti hi khua a ruah ter ngai. Hmailei thil kong kan hmuh chunh khawh mi a um lo caah maw a si hnga. A si lo le miphun dang or holh dang a holh mi poah hi maw kan uar hna i kan tlaih chan tuk hna hnga. A si lo le kan khua ruahnak nak neh maw a phan lo hrimhrim dah a si hna ka ti.
Vawlei cung ah a fim cem le a thiam cem le a hngalh cem USA pi hmanh nkh zeithei lo le zei hngalh lo Chin miphun hi kan ram an luh tikah thil liangngan pi pi an tuah khawh ve ko. Kan mah ral lila zong an si kho an ti caah cun pei an ram kan luh hlan ah ttha tein an kan check ta hmasa hi.Cu caah u le nau hna kan ram caah, kan miphun caah tuah khawh mi le ser khawh mi thil Lian tham a um dah kaw, kan niam bik hlei lo. Kan der bik hlei lo. Kan hrut cem fawn lo.
Chin miphun chung in mifim le Mithiam, Mirum le mi ropui, pasal ttha ttha le nu sal ttha ttha an tam pi ve ko dah kaw! ti kha chim le langhter ka duh mi a si. Chin miphun kan zapi tein Kanmah le pahrang cio In a hme he e ngan he, thil khuaruah har tam pi he tuah khawh mi a um leng luang ko. Kan kut ah Uk nak phan seh law van ah kan zuang lai. Kawl pawl an khuaruah a har lai. An ning a ttih lai. An mang a chia hrimhrim lai.Cucaah Chin miphun lungrual tein dir tti u sih law ttang tti hna u sih. I tthen hlah u sih. Hriamnam lo In kan pu le min Japan ral le Mirang ral an rak doh ko e tiin ka bia ka donghter.
Kaalawm
Salai Joel Zaathang
