Dalaan Ruangah A Nun Bu Bak In Mei Khangh A Si

Dalaan ruang ah SAC ralkap nih Ko Min Min a nun bu in meikhangh, kum 14 pakhat thah.Magwe (Magway) Ramthen Myaing Peng Ayechantha Sanpiah khua, September 14 lio ah meithal kuanfang hman a tuar mi Ko Min Min cu SAC ralkap nih a nun bu in mei an khangh, kum 14 pa Mg. Tun Myint zong an thah i khuami 10 renglo an thah hna tiah theih a si.

September 14 zinglei ah SAC ralkap nih Ayechantha khua cu RPG in an kah. Ko Min Min @ Thet Naing Min cu ake ah an khen i a zaam khawh ti lo caah a nun buin mei an khangh. Kum 14 Mg. Tun Myint cu a thicolh.

“Dalaan nih PDF an um tiin a chimh hna i SAC ralkap pawl nih RPG voi 3 an kah hnu ah khuachung an hung lut. Ko Min Min cu a zaam kho ti lo. Minung kan i check tik ah kum 25 a si mi Ko Min Min cu mei in an rak khangh,” tiah khuami pakhat nih a chim.

SAC ralkap 200 hrawng cu Ayechantha le a pawngkam khua 7 ah an lutchuak i khuami 10 renglo an thah cang hna, tiah Khit Thit Media nih a tial.

Credit: Laica + The Hakha Times

Author: Salai Ephraim