Daw Suu Kyi Nih Ithim Nak Kongah Mipi Sin Biacahnak A Tuahmi Cu Roling Than Ko Hih

2020 kum thimnak he pehtlaiin NLD Chair sinin biacah.“Mipi le NLD, NLD le mipi cu ṭhen kho asi lo. Mipi tha peknak hi kan ca’hcun nunnak asi. Nunnak ding ca’hcun kan thaw chuah aum peng a hau bantuk in kan mipi pawl nih thaw chuahnak lei ngandamnak ralrin a herh i nan dam a hau. September ni 8 thok in mipi nih NLD tha nan kan pek dan biatak tein hmuh asi tik ah kan i lawm ngaingai, kan ca zongah a sunglawi tuk hringhran.Sihmanhsehlaw atu bantuk tha peknak langhter tik ah Covid-19 zulhphung ning tein kan um ṭhut a biapi ngaite. Kan teinak cu kan ram caah asi ram caah teinak timi cu mipi caah asi ding asi. Mipi ṭha hnemnak he aa ralkah mi thil cu kan caah teinak tling asi bal lai lo. Cua’h mipi ca ti tik ah chan tawi he caan sau he ruah ding thil an si. Mipi ngandamnak caah caansau ruah a herhmi cu a hlei in ka chim ti lai lo, caan tawi caah ruah ahcun November thla ni 8 ah mipi pawl nih thimfung thla kho tu si hi a biapi cuca’h khi ni tiangah ngandamnak he aa tlak in um le ṭhut kan herh.

Cu lawng siloin kha ni pin lei teinak lawmhnak ding caah ngandam a herh rih. NLD tha petu pawl nih Covid-19 zawtnak he pehtlaiin zulhphung pawl tha tein zulh ding asi…zulhphung ning tein NLD cu tha pek khaw asi. Tahchunnak ah NLD thantar tete mah le inn cio ah tar in siseh, NLD angki tete i hruk in siseh, NLD sticker pawl tuah i motor ah siseh, a dangdang ah benh zong kha NLD dirkamh le tha pek asi ko. Cu bantuk thil pawl kan hmuh tik ah kan tha a tho ter chin. Mah caah ral asi lo mi tha peknak phun in tuah ding asi. Kan ram huap in NLD thantar a cuang hnga dingmi hmuh kan duh, cuti thil tuah mi thawngin mipi ngandamnak ca zongah ral a chuak kho dingmi asi lo. NLD nih palai pawl nih Covid-19 zulhphung ning tein mipi sinah lemsoinak tuah asi te lai, cu tik zongah mipi nih teltum a herh lai.

Atu lio caan ahcun mibu in ton i NLD tha peknak langhter caan a si lo. Teinak kan lawmh caan a phan te lai cu caan tiang hngah khaw, hngah kho nak thazang lei ralṭhatnak a herh. 2020 kum thimnak ah NLD nih teinak ngan bik hmuh kan duh, cuca’h mipi pawl nih thimfung thlak kho hi pakhatnak asi.Hihi a biapi tuk caah ngandam kan herh, thazaang kan i hrim a herh, i funtom kan herh. Funtom ti tik ah pumsa in hmunkha ah mibu he um kha chim duh mi siloin thilung ruahnak he kan i funtom ding khi asi. Teinak kan ti tik ah thimnak lawng siloin Covid-19 zong hi kan tei a herh ve caah Covid-19 zawtnak a ngeimi an karh ziah kha zapi theih asi caah hihi kan khamh kho a herh, Covid-19 zawtnak khamhnak sii a chuah tiang khamh kho kan i zuam a hau. Kan mipi sinah Covid-19 zawtnak khamhnak sii tling tein a phanh tiang kan izuam a herh. Khi caan kan phanh te tik ahcun kan ram teinak he aa khat mi ram pakhat kan si te lai.

Cu asi caah a tu caan cu fek tein kan dir a herh. Mipi pawl nih thil ti khawhnak pawl langhter izuam uh law mibu he um loin zeitin lam deuhin dah NLD tha kan peknak a lang kho lai timi lei ruat kho uh law a ṭha. Mah tein umkal pah zongah NLD tha peknak hlasak zong khi NLD thapek ning cang phunkhat asi ve ṭhiamṭhiam ko. Zeibantuk tha peknak paoh a hme a ngan tiah aum lo. Mipi pawl atu lio zawtnak i chawnh lo ding le zawtnak a karh lonak dingin zulhphung pawl zulh in zeitin dah NLD tha kan pek kho lai timi hi ruah kho izuam in zapi nih November thla ni 8 ah NLD teinak hmuh khonak caah thimfung thlak dingin kan sawm hna.”tiin NLD Chair asi mi Daw Aung San Suu Kyi nih mipi sin biachimnak a ngei.

Source- Chair NLD ( CCN )