Dinfelnak Dir Kamhtu Pi Suh Sihni Daw San Ma Lar Nyut Cu Ralhrangbu Nih Zei Hmanh Na Chin Lailo Tiah Na Chim Ah Cun

Daw Aung San Suu Kyi sihni hna lakah Daw San Ma Lar Nyut cu ralhrangbu nih ramchung/ramleng media le bu hna sinah thawngthanh lo dingin minthut ter a si tiah theih a si.Ralhrangbu nih nawlngeihnak a lak hnuah Daw Aung San Suu Kyi cu sualnak 11 he tazacuai a si i, biaceihnak ah a dirkamhtu sihni 5 hna cu mipi sin ah thawngthanh kho lo dingin an rengh mi hna hi a si.

Yangon ah a ummi Daw Suu sihni pakhat a si mi Daw San Ma Lar Nyut cu August 6 zaanlei ah palek nih an rak hruai i, Tamuay myone, GAD zungah ramchung, ramleng media le bu hna sinah thawngthanhnak kan tuah lai lo tiah biakamnak an tuah ter tiah an ti.Penguk bawi nih ramdang he pehtlaihnak na ngei lai lo,Thawngthanhnak zeihmanh na tuah lai lo a ti hnuah an thlah than tiah sihni pakhat nih a chim.

Atu ah Daw Suu sihni panga hna hi pakhat le pakhat an i chawnh khawh lo caah Daw San Ma Lar pin ah a ho dah biakamnak an tuah ter ti theih a si rih lo.Daw Aung San Suu Kyi hi khua zeidah an chiah ti zong fiangfai in theih khawh a si lo. Naypyitaw council kulh chung inn pakhat cu biaceih zung caah an hman i covid a karh hlan ahcun zarhkhat ah voi hnih a kong an ceih tawn mi a si.

Covid-19 third wave hnuah ramchungah zawtnak a karh caah biaceihnak zong July thla in August thla ni 15 tiang sianginn le zung vialte khar a si tiah theih a si.Daw Aung San Suu Kyi sihni 5 lakah U Khin Maung Zaw, Daw Min Min Soe, U Te Maung Maung hna cu Naypyitaw ah a um mi an si i, U Kyi Win le Daw San Mar Lar Nyut hna pahnih hi Yangon ah khua a sa mi an si.

Ref: Myanmar Now