America president Donald Trump cu president a sinak in thlak dingah Democrats party hruaitu tampi hna nih an tawlrel cuahmah.Democrats hna nih cun zei tin dah Donald Trump cu a sualnak kan hmuh lai i America president riankhinh a sinak in kan thlak khawh lai tiah a lamkip in a sual nak an kawl cuahmah na in president Donald Trump nih cun Democrats pawl hna nih ka cungah mah bantuk thil an tuah mi hi an mah le an mah zei kan si lo,santlai lo kan si tiah mipi sin ah an i langhtertu a si deuh tiah lehnak a tuah.
President Donald Trump sualnak a kawltu chungin mi pakhat nih cun president Trump nih hin July 25 ah khan Ukraine president Volodymyr Zelenksy cu a thli i a chawnh i 2020 US president ithimnak kongah a ho dah Democrats president candidate hna lak ah hin zumh cem mi a si lai?cucu a thli in na rak dothlat awk a si lai.cu hna chungah a bik in Democrats president candidate Joe Biden cu hawi hlei in na rak dothlat khun lai tiah a chimh i,Ukraine president Volodymyr Zelenksy zong nih Trump chim mi cu tuak piak dingin timhlamhnak zong an ngei tiah a chim.
Cun, Trump nih Ukraine president Volodymyr Zelenksy sin ah a chim t’han rih mi cu ka chim ning bantuk in na tuah lo a si ah cun Ukraine ram mi hna sin ah America nih bawmhnak a pek mi hna cu pek lo in hnawl nan si lai ti zongah a hrocer fawn tiah a chim.hi konghe pehtlai in House Speaker Nancy Pelosi nih cun president Trump rian t’uan ning cu a thar in chek hlatnak tuah t’han a si lai tiah a chim t’han rih.
House Speaker Nancy Pelosi nih cun kei le House Intelligence Committee chairman Adam Schiff nih cun Trump rian t’uan nak dothlatnak tuah ko lo ah cun rian dang kan ngei lo tiah a chim.Trump nih cun House Speaker Nancy Pelosi le a hawi le hna nih hi tibantuk in ka rian t’uan nak check hlat an ka timh mi cu America mipi hna cungah thil t’halo an tuah a si. Ukraine President he i chawnh biaknak neih cu a herh tuk mi a si. Ukraine President nih hin kei mah lawng vun chim lo a duh mi hna paoh a kawmh khawh mi hna an si ko tiah mipi sin ah a chim.
Source: BBC
