Esther Nih Na Kan Dawt,Na Kan Tanpi,Votting Na Ka Pek A Ti Mi Hi Halkha Holh Palh A Si Rak Cawn Piak Uh!

A chim kho nih ka chimhpiak sawh te u.Nikum Myanmar Idol cu a laar bak. Zeitiang dah a laar tiahcun, nikum in a laar i tukum tiang a hong laar lan. Hi tlukin a laar hi hlasak zuamtu pawl an thiam tuk ruang ca lawng a si rua lo. Myanmar Idol hon ti vialah khin Ko Latt le Mah Maw le Mah Phyo le Kyaw Thet Aung mitthlam ah an hong cuang colh ko. Anmah hnu ceo ah hlasa pawl pakhat hnu pakhat in an hong mang cio khi a si.

Zeizei a va si ah, kan fanu Esther a laar bak ve hoi. A laar hlanah Esther a um le um lo hmanh zapi nih kan thei lo nain, a hon laar hnu tu ahcun a ek le a voih tiang kan theih dih cikcek. A si he, si lo he. Mi laar kan ti cu, a chungkhat cingla rualchan va si lo hmanh ah ‘’kan rak i thei bal’’ hei ti hrawnghrang hmanh khi san a tlai. Keimah zong zoh khawh a simi paoh le ngaih khawh a simi paoh cu ka tlolh bal ve lo. Cu chungah thil pahnih te ka lungah a tap peng. A laar lo tukmi nih a laar tukmi sinah biacah awk zeitihmanh in a si thiam lo caah a chim kho nih rak ka chimhpiak sawh te u.

Pakhatnak;Interview an tuah tawn tikah “nan ka dawt nan ka ṭanpi i, votting nan ka peek caah” hei tiding khi “na kan dawt, na kan ṭanpi i, votting na kan peek caah” a ti tawn. Mah khakha Laiholh palh a si i, Halkha holh palh zong a si ee, tiah rak ka chimhpiak sawh te u.Pahnihnak;Monywa pa an ti maw, Kawl nih ‘’tachin cii” an timi bakin hla a phuahtu, Medalin he a satu pa kha Ks. 100,000.00 tal in laksawng rak pe ve te sehlaw, ti zong rak ka chimhpiak rih fawn u.

Biadang a peh>>Thantlang hi kum saupi ka rak umnak a si caah ka tlaihchan peng ko. Thantlang ka rak um lioah “Thantlang cu luhmuhzi a ṭha i um a nuam” an rak ti tawn. Mi thi an um tikah thlan cawh kan rak i thawh tawn i, kumkhat chung thlan cawh a tam bik laksawng zong kanmah “group” an rak kan peek bal. Mi thi an um tikah bulhnak cazin ka rak tlaih ve tawn. Thantlang khua i bulhnak cazin tlaih hi mi sawhsawh nih an tlai kho lo. Mi a thei ngaingaimi si a hau.

Thih dar an tum i, mithi inn a phan hmasa mi pawl hi mirum le min ngei an si zungzal. Dawr a tuahmi hna an dawr an khar i mi thi inn an kal dih tawn. Cozah rianṭuan bawi pawl zong zung hngak pakhat lawng an chiah ta tawn i, an zung ning piin mi thi inn ah an rak kal dih tawn.Tukum CND cu Thantlang ah ropui ngai in tuah an timh.CuCND ah Thantlang khuami nih an rak ka sawm ve hi ka chan chungah ka chim dingmi ka philh khawh lo dingmi thil pakhat a si. Hihi Thantlang ka rak um lioah “Thantlang cu luhmuhzi a ṭha i um a nuam” an rak ti tawnmi kha a si rua!

Credit:Perhkalh Thawng