Hakha Khuapi Tihhlah A Um Bal Lo Mi Thil Pahnih Bawipa Nih A Kan Tuah Piak Cawlh Cang

HAKHA KHUAPI TIH HLAH NA THINPHANG HLAH.Khrihfa hlabu fung 150nak cangthumnak ahcun, ” Ser-mi thil vialte hna zong hi PATHIAN lamkaltu an si dih,” tiah kan hmuh. Nihin, Hakha khua zongah ser-mi thil hna hmangin, BAWIPA kan PATHIAN nih a umbal lomi Khuaruahhar pahnih (Tehte pahnih ) a kan tuahpiak!

1.Ar an khuang: Sept 20. 2021, zaan suimilam 11:45 hrawng ah Bomb thawng le Meithal thawng lakah kan Ar khong pawl nih țihnak ngei bak loin an hung khuang lulhmalh hna! A theihngal nih an chim tawnmi cu, “Bomb le Meithal thawng lakah hin Ui le Ar hmanh nih an țih i an awn au ngam lo,” ti a si.Hakha khua ahhin Bomb puak thawng le Meithal thawng kan theih a tam ngai ve cang. Hi chungah hin, Ar an khuan hi ka thei bal lo.Bomb le Meithal thawng kan theih ahcun, mei kan hmih dih cio i daitein kan i duup cio ko hna. Minung he țilva hna he daiduup kan um tawn ko. Sihmanhselaw Sept 20 zan cu Bomb thawng le Meithal thawng lakah, Lai Ar khong pawl cu țihnak ngei bak loin, vawidang lo bang an hun khuan lulhmalh ka theih tikah ka chunglei ahhin, lawmhnak le hnangamte ka ngei ko! Zeidek, thil pakhat-khat PATHIAN nih a kan chimh duhmi le tuahpiak duhmi a um ko lai tiah ka ruah!

2. Ti pung a khat liam: Sept 20. 2021 zanin aa thok ve i, Hakha thar Kanaan veng, Pu Bawi Peng te an tipung cu aho nih rawn lo bakin, amah tein a khat ko! A khah lawnghmanh si loin a liam thluahmah i caan saupi chung a luang! Hi bantuk in tipung amah tein a khah i a luan hi, Hakha Ramchung ah a um kan thei bal lo!
Atu bantuk Mipi ci-ai i kan um lio caan thengte i, sermi thil ‘Ti’ hmangin, BAWIPA kan PATHIAN nihcun, a kan Dawt, a kan Zaangfah, Vel a kan ngeih tuk caah, Khuaruahhar thil a kan hmuhsak nak hmangin, “zeizong tuah khotu, a um lomi zong a umter khotu PATHIAN a si i, ka bochan hna seh, ka zuum hna seh, țih hna hlah seh, an thinphang hna hlah seh,” tinak caah Khuaruahhar thil (Miracle) a kan tuah piak hi a si. Kan Chinram/Lairam ahhin, Khuaruahhar thil hi a um tuk bal lem lo caah, hi bantuk i thil a um hi Thlarau leiah a kan chap le kan țhancho pakhat zong a si.

Cucaah; Bomb puak thawng le Meithal puah thawng lakah, Lai Ar khong hna nih țihnak ngei ti loin, an hun khuan lulhmalh cu, hi hna an Bomb thawng le an Meithal thawng hi,” Hakha Khuami hna țih hlah u, therphang hlah u, kan Umpi ko hna,” a kan ti nak a hih!Ti pung aho rawn lo i amah te i a khah i a liam i a luan thluahmah cu, BAWIPA kan PATHIAN nih, ” Maw Hakha khuapi, a um lomi a umter kho tu, a si kho lomi a siiter khotu, nan PATHIAN ka si hih, ka zuum ko u, ka bochan ko u, țih hlah, na thinphang hlah,” a kan ti nak a si thiamthiam.BAWIPA nih zaam u a kan ti lomi le aho nih dawi lo pi i, zaam le tlik rumro timh zong hi PATHIAN zumh lo le bochan lo a si. Hakha khuachung lila ah hmun himnak deuh le a himnak kan i tuah ah a za ko.

Profet Isaiah le Juda siangpahrang Hezekiah nih BAWIPA an i bochan i biatak tein, thla an cam tikah Jerusalem cu a thawng tukmi Assiria siangpahrang Sennakherib kutin a rak khamh bantuk khan, Kan Ram khualipi Hakha hi Rimnampa Sennakherib Bomb le kuan lakin khamh a si nak hnga zaam loin thlatu biatak chinchin in kan cam deuh awk a si.Kei cu, BAWIPA kaa bochan, BAWIPA hi ka zumh. Tehte pahnih a kan tuahpiak hnu chinchin hincun, ka zumh chinchin! Hakha khua i PATHIAN mithim hna nih THIANG THLARAU kan doh i a ngaih kan chiatter dah ti lo ahcun, BAWIPA nih a kan huhphenh lonak ding ka thei lo.

Lamkaltu
Tluang Lian ( Martar)

Author: Salai Ephraim