Hakha Ralhrang Rual Cu Rianrang In Chuncung Khua Lei Ah Motor Pakul In An Kal

Tute koko ahkhan Halkha in Chuncung khua lei ah ralhrang 20 tluk motor raang mi in an kal.Anmah ralhrang motor tucu Halkha thar lamruk tonnak ah an chiah i, civil motor cit in Chuncung lei panh in an kal lio tiah Salai William HC nih a mah fb cahmai ah a tarlangh.

Relchap:Tu zing suimilaam 8:00 hrawng ah Council ralhraang pawl nih Mindat khua in Madap khuate cu hriamnam ngan in voi ruk nak tlawm lo an kah caah thla hnih bawhte pakhat a phei ah a khen i zaan ah a nunnak a liam, hma a pu mi zong an um tiah kan theih.“Khua chung ah voi ruk hrawng a tla.

Sii-inn pawng zong ah a tla. Lo chung zong ah an tla. A dihlak fonh ahcun zun 20 hrawng a si men lai. Safehouse ah a um mi thla hnih bawhte miakpi kuan nih a khen i zaan suimilaam 2:00 hrawng ah a thi,” tiah thawnghram pakhat nih a chim.Cu lawng si lo in tu zing ah hriamngan kuan nih a khen mi ngakchia pakhat zong a ke khatlei a bul i khatlei a ruh a kiak. Wanmatu ah thlop ding in an timh.

Ralhraang kah mi hriamnam ngan ruang ah khuami tampi zong hma an pu tiah kan theih.Hriamnam ngan an kah mi chung ah a puak rih lo mi zong an um caah khuami an thin a phaang tiah theih a si.May 22 zaan ah CDF-Mindat nih Mindat khua Meithat Zung ah umhmun a khuar mi ralhraang pawl an va kah hna i ralhraang pahnih an thi tiah CDF-Mindat nih an thanh.

Credit:TheHakhaPost

Author: Salai Ephraim