Hakha TMC Biakinn Cu Rev. Solomon Ceu Kam Nih A Mah Nawl In A Zuar Caah Ahohmanh Nih Nan Caw Kho Lo

Kan theih cia bantuk in a tu lio kan Chin ram khualipi a si mi hna pahnih Hakha le Thantlang ah cun pakhat le pakhat karlak ah i entei nak le mah zawn lawng ruah nak,asi lo ah kei mah kan paw khim paoh ah cun a poi lo timi ruahnak a kengmi tampi um ruangah mipi thinglung a zawt dih lio le mithmai a pangh khawh lo lio a si.

 

Hakha khuapi chungah cun Chin state cozah le Hakha loram ngeitu (pupa ram ngeitu) hna karlak ah a buaibai cuahmah.cu ve bantuk in Thantlang khuapi chung zongah ningcang lo in miram le mi dum i zuar piak le i chuh etc..tibantuk tam pi a chuak cuahmah ve.hi thil vialte hna hi ruah tik ah a cozah vun chim lo in Laimi kan lungput ning hi a dik/hman mi lungput a si maw? tiah ruah lo awk a t’ha lo.a ngaingai tiah ah hakkau ruangah le mitpar kan ngeih tuk ruangah a si!

 

Hakha khuapi chungah pumhnak inn Pathian thangt’hatnak ah TMC Khrihfabu hna nih an hman cuahmah mi Biakinn zong mi pakhat nih a mawh nawl in a zuar cuahmah tiah theih a si.cu konghe pehtlai in The Hakha Post nih a langhter ning ah cun,”Hakha, Keihsih sang, Sii-inn laam um mi Pu Tawk Mang le Pi Mang Zi inn cu Singapore in Rev. Dr. David Seah nih Hakha TMC Khrihfabu Pathian Biakinn ah a kan cawkpiak mi a si i kum 17 chung, nihin ni tiang Pathian thangthatnak ah kan hman lio mi a si tiah The Hakha Post in thawng kan rak thanh cang.

 

Hi TMC Biakinn cu Rev. Solomon Ceu Kam nih a zuar ca ah ahohmanh nih nan caw kho lo. Zuarnak nawl zong a ngei lo. Nan cawk zong ah TMC Khrihfabu nih kan in kian hrimhrim hna lai lo. Zumtu Khrihfa vialte nih Pathian sin thlacamnak in rak kan bawm cio ko u” tiah the Hakha post nih theihternak an tuah.TMC, Hakha

Author: Salai Ephraim