HELL IN A RA MI NIH CUN MEI-TTIL A TTIH TI LO (NLD KA ZUM KHO TI LO)

1896 in Mirang nih Chinram dihlak cu Britist Siangpahrang Nu pennak ah an khumh. Asinain Mirang uknak cu Chin caah Hell tlak bantuk taktak asi lo. Kan nunphung le kan holh an hrawk lo. Kan ti le ram an hrawk lo. Kan nawl ngeihnak an kan chuh dih lo. Mirang nih an rak kan uk hi kan caah thiltha tampi hmanh a chuak deuh. Mirang nih cun Chin kan tuanbia an kan serpiak. Caholh an kan tuah piak, ramri tha tein an kan tthen piak. Kan pupa hna kha I-Ukhruai ning tha tein an cawn piak hna. Siasal le khuachia biaknak in an kan chuah i a nungmi Pathian lam ah an kan hruai. Hell kan rak tla taktak lo.

1947 thok in Chinram cu hell ah kan tla ruangmaang. Kanram dihlak an kan chuh pin ah nawl ngeihnak vialte an kan lak piak. Kan caholh an hlot, kan nunphung an hrawh. U Nu acozah thok in Newin le Ralkap chan USDP in NLD atu tiang Kawl Bahu nih an kan uk an kan peng. An kan neek.Chin kan caah ahodah kan Hero ansi? Caholh a kan tuahpiak tu hna Mirang Siangbawi pawl kha kan Hero ansi. Biaknak lei a rak kan hruaitu Van lo, Sang Fen, Chawn Tur, Sang Ling le Chan Thang hna kha kan Hero an si. Japan ral a rak dotu Chin Ralkap pawl kha Chinmi a kan cawi sangtu kan Hero ansi. Thihnak tiang tuar in Newin ralkap a dotu Salai Tin Maung Oo hi Chinmi zohchunh awktlak kan Hero a si. (An tampi rih)

 

Chinmi caah mizei Mon le Rakhine pa nih tthatnak a tuah bal. Mizei kawl pa nih dah Chinmi Hero asi ti-awk tiangin kan caah thiltha a tuah bal. Kawl sal kan si ko ti kan i fiang hlan chung cu ram le miphun dawtnak thinlung kan ngei kho lai lo.NLD cu Tlangcungmi luatnak caah kan rak i bochan, ruahchannak tampi kan ngei. Asinain kan i ruahchannak bantuk an si ti loh. Cozah an si hlan i an biakam le an i tinhmi cu Cozah an hung si taktak tik ah zei te hmanh Thlennak CHANGE a um hlei lo. Thlitu lak voihvoih men bantuk lawng asi ko. (Ralkap khih ti hlah uh)

 

Kan hnulei i NLD EC meeting zoh tik ah Tlangcungmi ca ahcun hnabei dong taktak asi ko. Tlangcungmi party he ( Allaince) i funh i cozah ser an duh lo. NLD nih seat dihlak lak tthan dingin bia an ceih. Tlangcungmi an kan zumh lo maw asi an kan ttih dek asi hnga. Ttih awk zong kan si pahnak cu FEDERAL UNION pei kan tlaihtleng asi fam cu. Cun an EC meeting biachahmi ah Phunghram remh ding policy phunphai a um ti lo, party teinak hmuh khawh kha a biapi an chiah cang.

Chin party tham cu tthutdan duh ruangah an dirh mi asi tiah nan soi hna. Asi ne kun ah Kawl Party NLD in Chinmi MP cuh mi pawl khi teh chinram an dawt tuk ruangah maw an i cuh asiloah Tthutdan duh ruangah dah an i cuh ve.U Win Myint nakin Pu Zozam nih Chinmi a dawt deuh lai ti ka zumh. Pi Suu Kyi nakin Pu No Khan Kap nih Chinram a dawt deuh lai ti ka zumh. Kawl party pawl nakin Chin party nih Chinram an dawt deuh hrimhrim ko hnga lo maw?

 

NLD policy ka nihchuak cemmi cu NLD nih teinak a hmuh lo ahcun Ralkap nih an kan uk lai ti khi asi. Pawta phurh maw nan duh tthan hei ti bantuk. NLD nih teinak hmuh duh ah Ralkap in an kan tthih phaih. Zei hmanh NLD nih a ttuan khawh ttung lo van ti sual ahcun RALKAP nih zeipoh an tlaih viar nan thei lo maw ti asi hoi. Kan lo ko.CNLD nih 2020 ah teinak a hmuh lo zongah Chinmi tampi thinlung ah Miphun dawtnak (patriotism) bia a chim cang caah a sung kho ti lo.

 

1947 in Kawl kut tang HELL ah kan tla cang. U Nu thok Newin in NLD tiang Hell ah kan tla. Ralkap in an kan tthih zongah kan ttih hlei ti lo. Kan nih ca ahcun an i khat dih ko. Ralkap i tthih phaih in Party teinak hmuh i timh hi nihchuak asi deuh.Khiih! Ralkap na ttih lo maw tiah rak kan tthih ti hlah u. Hell mei chung in a ra mi nih cun mei-ttil ttukttak cu kan ttih ti lo.Pathian Jaweh nih kan Chinram cu thluahchuah a pek lai. Ziontlang thiang cu Chinram ah a dirh lai. Zion fale Chinmi hna tho cang tuah uu..Miphun party cungah Jaweh nih thluachuahnak pee seh .(Amen)

Credit: Jacob R. Thang

Author: Salai Ephraim