Hluttaw Chairman Pu Zo Bawi Nih Cenghngia Kap Mi Phaisa A Pek Duh Than Hna Lo

Chin ramkulh cozah nih nikum ah satil sehtu cenghngia a kap kho i a van chuahpi kho mi cu tangka thong sawmnga laksawng kan in pek hna lai tiah media in thawng an rak thanh nain a taktak ah an pe kho than lo.

 

Satil a sehtu cenghngia a kap kho i a lu le a mei he a van chuahpi khotu cu laksawng tangka thong sawmnga kan in pek hna lai an ti ca ah kan khua caw a seh mi cenghngia ka kah i ka van chuahpi nain Chin cozah nih ‘kan ceih mi a si ko nain laksawng kan pe kho than lo’ an ka ti, tiah Hakha peng Langpho khuami Pa Peng nih Februay 15 ah The Hakha Post ah a chim.

 

Hluttaw nih kan ceih nain a tuanchuaktu ding Uknak lei Zung (Htwe oh) lei nih an tuah khawh lo ca ah kan pek khawh hna lo mi a si” tiah Hluttaw Chairman Pu Zo Bawi nih The Hakha Post ah a chim.

 

Hi kong he pehtlai in Pa Peng nih Cozah nih tha tein media ah an thanh mi a si i an pek khawh rua lai tiah kan ruah. Cun tangka duh ah si lo in kan satil an seh tuk tik ah khuate lei ah kan ton mi hi cozah zong nih kan theihpiak ve hna seh ti kan duh tiah a chimchap.

 

Credit: Myanmarchins.com

Author: Salai Ephraim