HOLHTHEIHLO KONG FIAN CIKCEK A DUHMI HNA CAAH; BAIBAL I A UM LOMI, PHUAHCHOM THLARAU RIANTTUANNAK.
Laimi Khrihfa hrintthan, Tlarau fa ai timi nihhin Jesuh fialmi nakin Jesuh fial lomi kan tuahmi a tam deuh. Thlarau Thilpek (Laksawng) nakin kanmah nih kan phuahchawmmi thlarau laksawng kan hman deuh. Evangelist pawl hi an felnak le an tthatnak a tampi ve. Asinain Baibal athei fiang lomi ngawt an si. Baibal hi word study (Baibal biafang pakhat hnu pakhat a dothlatmi) an si lo. An cawnpiakmi member pawl he an theihnak le an hmuhnak ai khat. An sining zong ai khat.
Thawngttha biatak an phuanmi cu attha nain Baibal i a um lomi, an phuah chommi thlarau exercise tam tukin an tuah pi hna i zaapi cu biatak ah i lawm ti loin Baibal i a um lomi thil tuah ah an i zaa khun. Bianabia ah, Greek Baibal ahhin “Holh theih lo” (Unknown Tongue) timi biafang hi a um lo. Holh (Tongue) ti lawng in a ummi a si. Mizo Baibal le Lai baibal nih an i leh palh caah “holhtheih lo” ti ah an leh caah “holhtheihlo” timi hi a um nak chan cu a si. King James nihhin ai leh sual ve i “unknown tongue” tiah a ti. Unknown (theih lo) timi biafang cu Greek Baibal ah a um lo caah italicized (asir sawt) in King James nih a ttial mi a si. Laimi nih Baibal an leh ahhin Mizo Baibal hi an i zoh ngai rua. English Baibal lawng let loin Mizo Baibal an leh chih. Mizo nih “Tawng hriat lo” a ti caah an i cawn i “holh theih lo” tiah an leh ve mi a si. Paul nih a ttialmi Biakam Thar ahcun “holhtheih lo” timi biafang hi a um lo. Greek Baibal ah a um lo. Mizo Baibal le Lai Baibal ah a um. Cu holh theih lo cu zei a si ti nan hngalh lo caah nanmah nih nan phuah chom. nan ser chom i Thlarau nih a kan peek nan ti. Kawl Baibal zongah “Miphun dang holh” ti in a leh. Baibal ah Thlarau nih a peekmi holh cu miphun dang holh i holh khawhnak tu kha a si. Cucu a dong cang. Tuchan ah a pe ti lo. An pee ve fawn lai lo.
Lai Tlang ah an holhmi holh theih lo cu Thlarau nih a peekmi hna a si lo. Anmah nih an lih in an phuah chommi a si. Paul nihcun a lettu an um lawng ah holh uh a ti. Laimi nih an phuah chom mi diddadalalafafa ticu leh khawhmi a si lo. Holh a si lo. Lih a si. An phuah chommi holh “didi,dada,lala,fafa,huhuhu” ti cu holh a si lo caah ahomah nih nihin ni tiang an let kho lo.
Leh khawhmi zong a si lo. Lai nih “didi” an timi cu Mirang holh zongin “didi’ ti asi ve ko. Leh awk a ttha lo. Leh khawhmi an si lo. Paul nihcun, “Thlarau nih a peekmi holh cu a lettu an um awk a si” a ti. Cucaah tuchan i nan holhmi “Holhtheihlo” hi cu Baibal ah a ummi holh kha a si lo. Nan lih in nan phuahmi asi i cucu “Thlarau Thilpek tiah Pathian tu nih ti loin, nanmah nih nan ti. Pathian Thiang Thlarau nih a rak pekmi hna holh cu “Miphun dang holh” in holh khawhnak kha asi i miphun dang holh cu lehkhawhmi a si. Cu lawnglawng cu baibal ah Thiang Thlarau nih a peekmi holh cu a si. Mah bantuk cawnpiaknak hman lo hi phalh khawh ti lo tiangin kan ram ah mei bantukin a lawn cang.
Atu i nan holh mi hohltheih lo hi Pathian Thiang Thlarau nih a peekmi si sehlaw Paul nih a ttialmi Greek Baibal zongah a um ve hnga. Zeicadah an i leh palhmi Baibal lawngah a um?
DAL 2 NAK “HOLH THEIH LO” MAW “HOLH DANG” DAH THIANG THLARAU LAKSAWNG A SI?
1. Kan Baibal Biakam Thar cu Greek holh in an rak ttial. Greek Baibal ah holh theih lo timi biafang a um lo. Glossa ti a si i a sullam cu “tongue or language” tinak a si. Thiang Thlarau Thilpek cu langugage (holh) a si. Dididadalala ticu holh a si lo. Language a si lo. language (holh) cu communication (cawnhbiaknak) tuah khawhmi khi a si. Lilidadafaffufu ti cu i chawnh khawh a si lo. Cucaah Laimi holhtheih lo hi cu hman dawh a si lo. Thiang Thlarau pekmi si dawh a si lo.
2. Kan Lai Baibal hi Good News (TEV) in lehmi a si. Kan Lai Baibal nihcun “holh theih lo” tiah a leh. Asinain hi an lehmi Mirang Good News ahcun “Strange tongues” ti tu a si i “holh dang” ti tu in leh ding a si deuh. “Unknown” ti hi “theih lo” tinak a si i “stange” ti cu “adang” tinak a si. Hi zawn ahhin Lai Baibal an lehning attha lo. Ahman lo. Mizo Baibal ah “Tawnghriat lo” ati caah an i cawnmi a si kho. Saya Hoi Cung Tum lehmi ahcun “holh dang” ti in aleh i hihi ahmanmi a si. Cucaah holh theih lo timi hi cu Lai Baibal an lehnak Good News hrimhrim ahhin hmunhma a ngeih lo caah nan holhtheih lo hi hman dawh a si lo.
3. Paul nihcun a lettu an um lo ahcun hmang hlah uh a ti (1 Kor. 14: 5). “Holh dang” or “miphun dang” holh cu leh khawh a si. Japan holh cu leh khawh a si. Didifaflala-lu-huhu ti cu leh khawh a si lo. Holh a si lo. Cucaah nihin nan holh theih lo hi cu hman dawh a si lo. Ttih a nung ngai.
4. Zumlotu hna caah hmelchunhnak a si a ti. Hlanlio zumtu hna cu miphun dang hna holh in Thiang Thlarau nih chimrel khawhnak Thlarau laksawng cu a rak pek hna (1 Kor. 14:22). An thiam ballomi holh in Thiang Thlarau thawngin bia an chim khawh tikah zumlotu hna kha an khuaruah a rak har tuk i Jesuh zumh khawh nak caah an rak hman. Sign a rak si. Didi-dada-lala-fafa- nan timi atu nan holh theih lo hi cu khuaruahhar ding zeihmanh a um lo. Zumlotu hna tluknak tu a si deuh. Cucaah nan holh theih lo hi hman dawh a si lo.
5. Atu i Laimi nih nan hmanmi holh theih lo hi Thiang Thlarau holh a si lo. Thiang Thlarau holh sisehlaw Thiang Thlarau hi mihrut asi hnga. Thiang Thlarau nih dididadalulu tiin a holh bal lo. Thiang Thlarau nih holh dangte a ngei lo. Thiang Thlarau nihcun minung nih kan hman mi hlah in communicate a kan tuah. A kan cawnh biak. Dididada ti in a kan cawn bal lo. Cucaah Laimi holh theih lo hi hman dawh a si lo.
6. Holh theih lo hlasak timi hi Baibal ah a um bal lo. Baibal i a um lomi poh cu kanmah nih kan phuah chommi lawngte an si. Pathian nawl loin phuahchhomnak nawl kan ngei lo. Cucaah nan holh theih lo hi hla hna in nan sak caah nan holh theih lo hi hman dawh a si lo.
7. Holh theih lo timi biafang hi Paul nih a theihmi biafang a si lo. Rak si selaw Paul nih a ttialmi Greek Baibal ah a um el hnga. Paul nihcun “holh” ti lawng a ttial mi a si. “Theih lo” ti ai tel lo. “Theih lo” timi biafang cu an i leh palhmi Baibal lawngah a um i leh palhmi biafang cu Pathian thawchuah hnawhmi a si lo. Cucaah nan holh theih lo hi nan mah nih nan ser chommi a si i hman dawh a si lo.
DAL 3 NAK.LAI BAIBAL AH HOLHTHEIHLO TIMI HI MIPHUN DANG NIH ZEITINDAH AN LEH CIO
1. GREEK BAIBAL. Baibal Biakam Thar cu Greek holh in an rak ttial. Thiang Thlarau thilpeek kong hi Pawl nih Greek holh in a rak ttial. Greek Biakam Thar ahcun “glossa” ti asi i “language” tinak asi. “Language” timi cu ” bia i chimhchawnh khawhnak holh” khi a si. Byzantine Majority Text le Textus Receptus zong nih “language” tiah an ttial.
2. MIRANG BAIBAL CHEUKHAT. a. New International Version (NIV), New Living Translation, English Standard Version, Berean Study Bible, Berean Literal Bible, New American Standard Bible, Christian Standard BibleChristian Standard Bible, Jubilee Bible 2000 nih “tongues” tilawng a hman. “Holh” tinak a sii. “Holhtheihlo” a ti lo.
b. Good News Translation (Today English Version) nih “strange tongues” a ti. “Holh dang” tinak a si.c. King James Version (KJV) nih “unkown tongue” a ti. “Holh theih lo” tinak a si. Asinain “Unknown” timi cu Greek Baibal ah a um lomi a si caah si sirsawt in ai ttial dih.d. International Standard Version (ISV) nihcun “Foreign language” tiah a leh. Miphun dang holh or ramdang holh tinak a si.e. New Heart English Bible, Aramaic Bible in Plain English, GOD’S WORD® Translation, World English Bible nihcun “another language”. “Holh dang” tiah an leh ve.Mirang Baibal ah “holhtheihlo” ti a hamngmi Baibal cu “King James” hi a si. “Asinain “theihlo” timi kha sirsawt in a ttial. Cucu miphun dang nih King James kha an leh tikah “theih lo” tinak zawn kha sirsawt in an ttial ve ti lo.
3. MIPHUN DANG BAIBAL CHEUKHAT a. Kawl Baibal nihcun “holh dang” (a chia-taw-bata-saka) tiah a leh. “Holhtheihlo” timi biafang fang khat hmanh a hmang lo.b. Mizo Baibal nih “Tawnghritloh” a ti. Zei Baibal dek an leh ka thei lo.
c. Lai Baibal nihcun Good News an rak leh. Asinain hi zawn ahcun Good News biafang a let lo. Mizo holh a leh. TEV Baibal ah “strange tongues” (holh dang) a ti komi kha “holhtheihlo” tiah a leh. Zeiruangah dah mahti an leh hnga ti hi ka lung piang lo. c. Saya Hoi Cung Tum lehmi ahhin “holh dang” a ti ve rua. Ahman ngai.d. Saya Rual Uk Lehmi hi ka thei deuh lo. A Baibal ka ngei lo.
DAL 4 NAK. HOLHTHEIHLO TUANBIA
“Holhtheihlo” timi cu Paul nih a ttialmi Baibal i a um lo lawng si loin Greek Baibal an copy mi pohpoh ah an um lo i Mirang Baibal zongah hin King James nih sirsawt in a ttialmi a si i, Mirang Baibal kan let ati ko nain Mizo Baibal tu a zul deuhmi kan Lai Baibal nih an i leh palh nak zawn lawng i a ummi a si caah “holhtheihlo” titu hmang ti lo in “Miphung dang holh in holh khawhnak” tuanbia hi kan i ruah hna lai. Zeicatiah “holhtheihlo” hi cu Baibal ah a um in a um lomi a si. Holh dang in holh khawh nak tu hi Thiang Thlarau nih a rak peekmi a si.
1. Zultu hna chan lio ahhin an chan hmasa tiang kha “holh dang” in an rak holh nak kan hmuh. Luke nih a ttialmi Lamkaltu cauk ah kan hmunh. Paul nih cakhuat a ttial hmasa bikmi hna cu Theselonica, Galati le Korin kuatkhatnak hi an si. Korin kuatkhatnak hi 56 AD ah a rak ttial. Cu hnu i a ttialmi cauk vialte ah Thlarau laksawng lakah pakhat asimi “holh dang” (Lai nihcun holh theih lo an ti) hi voikhat hmanh a chim ti lo. Hebrew, Peter cakaut, Johan cakuat, Jude le Biaphuan cauk zongah kan hmu ti lo. A thawng a dai cang.
2. Church Father pawl zong holh dang in holh khawh nak a ngeimi an rak um lo. (Cleon L. Rogers, “The Gift of Tongues in the Post-Apostolic Church,” Bibliotheca Sacra 122, April-June 1965, 134.)
3. Montanus nihhin 150 AD ah “holh dang” in chim khawhnak Thiang Thlarau nih a ka peek a rak ti nain a holhmi kha ahman lo caah Khrihfabu vialte nih an rak doh. Cawnpiaknak hman lo na si an rak ti.
4. Polycarp, Papias, Cyprian, Chrysostom, Augustine, Origen tehna hi catial minthangmi an rak si. Augustine nih a ttialmi “City of God” timi cu keimah zong nih ka ngeih ve. Hi early Church writers pawl zong nihhin holh dang in holhnak kong he pahtlai in ca an ttialmi pakhat hmanh a um lo. (Michael P. Hamilton, The Charismatic Movement, 1975, p 64)
5. Zultu hna chan (apostolic age) a dih hnu ah “Thlarau nih holh a ka peek rih” a timi poh cu cawnpiaknak hman lo, kalsual ah an rak chiah hna. (John F. MacArthur, Charismatic Chaos, 1991, p. 234)
6. Apostles’ creed (Reformed church pohpoh i an zumhnak, doctrine tlangpi) cu pumhnak chungah zaapi tein a chim lengmang i an sunhsak ngaimi a si. Hi Apostles’ creed zongah hin “Holh dang” kong hi pakhat hmanh an telh ti lo.
7. The First Council of Nicaea hi atu Turhey ram Nicaea khua (Atu Iznik Khua) ahhin 325 AD ah an rak tuah i Khrihfa zumhnak hrampi cu an rank tuh. Hi ahhin Jesuh 100 ah 100 Pathian asinak tehna Trinity tehna konghi fehternak an rak tuah. Asinain holh dang (holhtheihlo) kong hi pakhat hman an rak buaipimi ah ai tel lo.
8. Kum 1900 ah American evangelist, Charles Parham nih holhtheihlo hi a rak cawnpiak hna. Holhtheihlo hi Thiang Thlarau baptisma nak a si a rak ti. Hi a zumhnak a dirpi ngaingai tu hi Wesleyan-Holiness Saya, William J. Seymour, asi i Azusa Street, California State i Los Angeles khua ah hram an rak i bunh. Cuka hmun cu nihin i holhtheihlo i a holh mi vialte nih kan hramthawknak a si tiah an pom. Cucaah vawlei cung ah holhtheihlo biataktein hman asi nak hi kum 130 lawng a si rih. Asinain vawlei cungah a karh rang bikmi thil pakhat ah ai tel.
9. Atu ahcun denomination 700 hrawng nih holhtheihlo hi an pom.
10. Adoniram Judson le Lai Tlang a rak ra mi missionary vialte holhtheihlo i an holh nak kong kan hngalmi a um lo.
DAL 5 NAK.VANMI HOLH, HOLH THAR, HOLH DANG LE HOLHTHEIHLO AI DANNAK
1. VANMI HOLH (1 kOR. 13: 1-2)Vanmi nihhin holh an ngeih. Holh an ngeih caah linguistic communication an i tuah kho. An i chawnbia kho kan ti lai cu. Paul nihcun 1 Kor. 13: 1-2 ah vanmi holh hmanh in holh ning law dawtnak ka ngeih lo ahcun san a tlai lo a ti. Hika zawn ahhin vanmi holh timi hi Baibal ah kan hmuh. Asinain vanmi holh in minung an rak holh bal ko timi Baibal ah a um lo. Cun, atu i nan holhtheihlo hi vanmi holh asi timi zong Baibal cacang pakhat hmanh a um lo. Paul nih a chim duhmi cu “hei holh kho hmanh ning law” ati duhnak a si. Nan holh kho lai ati nak a si lo. Bianaah Jesuh nih, “mi pakhat nih vawlei i a zaapi tein ngei hmanh selaw, a thlarau a sungh ahcun zeidah a ttha hmen” ati. Vawlei pumpi na ngeih dih lai tinak asi ve lo. Hei si selaw tinaksawhsawh a si.
Cun vanmi holh hi zeibantuk holh asi ti hi kan thei lo. Vancung ah kan kai bal lo. Asinain vanmi nihcun minung holh, minung nih an hmanmi, an theih khawhmi holh in bia an rak chimh. Dididede-fufufu-huihui ti in an rak chawn bal hna lo. Cucaah nan holhtheihlo hi cu vanmi holh cu asi hrimhrim lo ti cu a fiang.
2. HOLH THAR (MARK 16: 15-17).Holh thar timi hi Mark 16: 15-17 lawngah kan hmuh khawh. Holh thar timi le holh dang timi aidannak cu holh dang cu zumtu vialte nih hmuh khawhmi, tinco khawhmi a si lo. Holh thar tucu zumtu mi vialte hmelchunhnak caah peekmi asi caah zumtu vialte nih an tinco mi a si. A zummi pohcu hi hmelchunnak hi peek an si lai. Holh thar (new tongue) in an holh lai a ti caah zumtu vialte nih tinco dih dingmi khi a si. Cucaah nan holhtheihlo hi cu Mark 16: 15-17 i holh thar a timi khi cu a si hrimhrim lo ti cu a fiang.
Holh thar cu zeidah a si kun? Zumtu vialte hna hmelchunhnak caah peekmi holh thar cu biachia a chimi nih khan, Jesuh dawtnak bia thar an chim lai. Lih chim a hmangmi nih khan an caah bia thar a simi bia hman an chim cang lai tinak a si. Holh thar cu Thlarau thilpek 9 lak i 1 kha a si lo. Zumtu vialte peek dihmi a si.
3. HOLH DANG (OTHER TONUGES) (1 kOR. 12, 13, 14) a. Holh dang cu miphung dang hna holh kha a si i Pathian nih Thiang Thlarau laksawng ah zumtu cheukhat (zumtu vialte an si lo) holh khawh nak a rak peekmi asi. A tingco mi an rak um. A tingco lo mi zong an rak um.
b. Hold dang cu miphun dang holh in Thiang Thlarau nih biachim khawhnak a rak peek hna. Cucu zumlotu nih an hmuh i an theih tikah an khuaruah a rak har tuk i zumh khawh nak caah an rak hman mi holh a rak si. Zumlotu hna ca i zumhkhawhnak caah hmelchunhnak (sign)a rak si. Dididedefufu ticu kuaruahhar ding pakhat hmanh a um lo. Zumlotu hna caah hmenchunhnak zong a si fawn lo.
c. Holh dang Thiang Thlarau thilpeek cu Pathian sin i thlacamnak le biathup chimnak ca zongah an rak hmanmi a si. dididede-dada tiin Pathian cu chawnh khawhmi a si lo. Pathian zong nih dididede-lala tiin minung a kan chawn bal fawn lo.
d. Pathian nih minung sin i ai phuannak (divine revelation) kha ai phuan dih i cu ai phuan nak cu Baibal ca i record an tuah dih hnu ahcun zumtu hna cu Baibal kha kan lam hruaitu asi cang (2 Tim. 3: 16). Pathian nih minung hna sinah prophet hmangin biachim ai dinh i Baibal hmangin bia a kan chimh cang. Minung hna cu Baibal lawng nih hngalhnak (knowledge) cu a kan peek cang i prophet hna hmangin hngalhnak a kan peek ti lo hnu cun Prophet zong Pathian nih a hmang ti hna lo. Israel ram zongah prophet an um ti lo. Laimi lak lawngah prophget ka si ai timi a zaa in an um. Cu prophet hna an dih rualrual cun Thiang Thlarau laksawng holh dang i holh khawhnak zonmg cu a dih ve cang (1 Kor. 13: 8-13). Cucaah kan ram Pentecostal pawl vialte nih an i bochan ngaimi holh dang cun atu ah a holh khomi an um ti lo. Anmah nihcun a dih rih lo cu an ti nain Thing Thlarau nih a peek ti hna lo caah Kawl holh, English Greek le Korea holh an cawn nakah an thi deng.
4. HOLHTHEIHLO; Greek holh in Baibal a rak ttial. Paul ttialmi ah ai tel lo. An i leh palhmi Baibal lawngah a um. Cu lehpalhmi Baibal ai tlaih mi hna cu mi vanchia an si i cu lak ahcun Laimi le Mizo hi kan i tel. Cu hna nihcun holhtheihlo cu an i leh palhmi an Baibal kha a hmanmi ah an ruah i holhtheihlo cu zeidah a si ti an hngalh lo caah anmah nih an ser chom i an lih in an holh. Acheu nih hla in an sak i mipi kha an rock ter hna. Baibal i a um lo zongah a poi an ti lo. Cu anmah nih a phuah chommi holhtheihlo cu Pathian Thing Thlarau thil peek a si an ti. An poi nakcu chimh fian zongah an duh hlei lo. Ahman lo ti an theih buin an ttanh chih.
DAL 6 NAK; BAIBAL I A UM LOMI CU PATHIAN BIA A SI LO. Atu kan chan ahcun Pathian nih Baibal lawnglawng in bia a chim. Baibal bia lawnglawng hi Pathian bia a si. Baibal bia lawnglawng hi Thliang Thlarau bia a si. Baibal in a ummi bia lawnglawng hi Thiang Thlarau rawl le kan thlarau nunnak rawl a si. Thiang Thlarau nihcun Baibal ning lawngin rian a ttuan. Pathian nihcun Baibal bia lawnglawng thlua a chuah. Pathian auhnak cu Baibal lawnglawng in theih khawh a si. Pathian kong cu Baibal lawnglawng in theihfian khawh a si. Baibal bia lawnglawng hi bia nung le bia hman a si. Pathian nihcun Baibal ning lawnglawng in bia a ceih lai.
Baibal i a um lomi kan tuah sual ahcun mitlau kan si. Baibal bia i khamh nai fian lo i lenglei awka i khamh nai fian ahcun khamh nai fiang ning ahman lo. Baibal chung bia siloin Pathian nih bia a ka ruah, bia a ka chimh na ti a si ahcun na lih asi lo hmanhah Sehtan awka na theihmi a si lai.
Zeitindah ka chim ngam? 1. Hlan ahcun (Baibal cauk tling tein ttial a si hlan ahcun) Pathian cu minung sinah aphunphun in a rak i phuang i Pathian nih aw in bia a rak chimh hna. Vanmi hmangin bia a rak chimh hna. Saram hmangin bia a rak chimh hna. Prophet hmangin bia a rak chimh hna. A fapa Jesuh hmangin bia a rak chimh hna. Laarnak, mang le vision hmangin bia a rak chimh hna. Thil lianngan a rak hmuh sak hna.
2. Asinain Pathian nih minung hna kan caaah a herh a timi vialte cu a phuan dih cang. A langhter dih cang. Bia chimh ding a kan ngeihmi vialte a kan chimh dih cang. Pathian nih phuannak a thar (new revelation) a tuah ti lo. Cu ai phuannak vialte cu Pathian nih a mithim mi hna kha a ttial ter dih cang hna i cucu Baibal a si. Pathian hi i phuang rih sehlaw Baibal hi an ttial chap rih hnga. Atuah Baibal biafang fang khat hmanh na chap kho ti lo. Baibal biafang fang khat hmanh na zuuk kho fawn lo. Baibal cu chap khawh ti lo ding le zuuh khawh ti lo ding in Biaphuan 22 nih seal a cumh cangmi a si.
3. Jesuh chan lio zongah Biakam Hlun Baibal cu an rak ngei. Asinain Pathian nih ai phuannak kha a dongh ter rih lo caah Biakam Thar Baibal ah ai phuang chap rih. Asinain zultu hna chan a dih hnu cun Pathian nih vanmi hmangin ai phuang ti lo. Cucaah vanmi na hmu kho ti lo. Prophet hmangin ai phuang ti lo. Cucaah prophet an um ti lo. An um ahcun nal-prophet an si lai. Pathian nih aw zong in ai phuang ti lo. Cucaah Pathian auhnak aw ka theih na ti asi ahcun na lih a silo ahcun Sehtan aw a si lai.
4. Cucaah kan ram mi prophet an timi vialte prophet deu an si. Vanmi ka hmu a timi vialte mi hrawhhrawl an si. Pathian nih aw in a kan auh, bia a ka ruah a timi vialte mi rureu an si. Pathian nih aw le vanmi le prophet hmang cun bia chim rih selaw Pathian bia cu Baibal ah pei kan chap rih hnga cu. Pathian bia cu kan zulh awk caah Baibal ah ttial kha Pathian nih a awnh zungzal mi a si.
5. Pathian nih Baibal cauk chap nak nawl a kan peek tilonak aruang cu Pathian nih vanmi hmang, prophet hmang, saram hmang le aw hmangin bia a chim ti lo caah a si. Pathian ai phuannak (all God’s revelations) cu a zaapi tein an ttial dih cang i cucu Baibal a si. Cu Baibal hmang lawnglawng cun Pathian nih bia a chim cang. Baibal lawnglawng hi lam a kan hruaitu a si cang.
6. Johan thawngttha John 21:25 chungah “hi cauk chungah ai tel lomi Jesuh nih a tuahmi tampi a um tiah a ti.” Baibal i ttial a si lomi Jesuh tuahsernak zong kha, kha chan lio i Pathian ai phuannak kha a si caah atu kan chan ah Baibal i ai ttial lomi hmangin Pathian ai phuang rih tiah na ti kho lo.
7. Atu lio vawlei ah cawnpiaknak hmanlo a zulmi vialte cu chanthar prophet le aw a zulmi an si. Pahnihnak ahcun Baibal ai hmuh palh i Baibal hrilhfianh ning ai palhmi pawl an si.
Cucaah na zumhnak le na nunning cu Baibal lawnglawng in vai check!
Credit: http://Aung Myint Thang
