Iran cozah nih America cozah caah rian t’uantu (ramngiatu) le UK ram caah rian t’uantu an si ko tiah minung pathum a tleih hna.cu minung pathum an tleih mi hna lak ah cun America ram SPY rian a t’uantu a si tiah an tleih mi pa cu Iran judiciary biaceih zung nih thah dingin biachahnak a tuah piak cawlh tiah an chim.
Iran nih a tleih mi hna,America ram mi hna le UK ram mi hna pathum kongah Iran cozah lei biachimtu Gholamhossein Esmaili nih cun an tleih mi hna pathum lak ah pahnih hna Ali Nafariyeh le Mohammadali Babapour hna hi cu CIA caah a thli in rian t’uantu an si.cucaah an pahnih in kum 10 chung,mi zei hmanh he an i pehtleih khawh lo nak thonginn chungah chiah an si lai tiah a chim.
Cun,British Intelligence he a pehtlai in rian a t’uantu Amin Nasab zong kum 10 chung thongthlak a si lai tiah a chim. asinain America ram mi an tleih mi thah dingah biachahnak an tuah piak mi pa kongah fianternak zei hmanh a tuah chih lo.Iran nih CIA he a pehtlai in rian t’uantu hi minung 17 a tleih cang hna.
Atutan ah Iran nih America ram nih a thlah mi ramngiatu thah dingin biachahnak tuah piak a si tiah an chim mi hi,kan hnung thla i Iran nih CIA agent a rak tleih mi hna chungin maw an si.asi lo ah a tutan ah a tleih mi hna minung pathum chungin dah an si tiah biafiang zei hmanh theih khawh a si lo.cun, nizan ah khan British anthropologist Kameel Ahmady cu Iran nih a mah nawlngeihnak hmangin a tleih fawn tiah an chim.
Source: BBC
