Israel Ram Chungum Ethiopian Ram Mi Hna Nih Israel Cozah Lungmit Lak In An Tuah Than Cang Hna

Israel ram chungah hin Ethiopian ram mi tam lak te an um pin ah Ethiopian ram mi hna nih hin Israel ram mi sinak an neih dih ngawt fawn.cu hlan ah cun Israel ram chungum mi Ethiopian ram mi pawl hna nih hin a tu bantuk in Israel cozah sin ah buaibainak taktak cu an chuahpi bal lo.asinain a tu tan an buaibai nak belte cu fawi tein mak an tim lo i Israel cozah a lungmit cang tiah an chim.

Israel ram chungum Ethiopian ram mi pawl hna nih a tutan i Israel cozah sin ah an buaimi cu,Israel cozah palik officer pawl hna nih an mah Israel ram mi bak le an mah ram chungah a um mi Ethiopian ram mi hna sin ah an rian t’uan ning hi ningcanglo thil a si,a ruang bik cu Israel ram chung palik pawl hna nih an rian t’uan nak ah an mah ram mi le Ethiopian ram mi hna karlak ah miphun thleidan nak an nei tiah Ethiopian ram mi hna nih an chim.

 

Cun,Ethiopian ram mi hna nih hi bia an chim nak hi Israel ram chung a si mi Haifa khua ah Israel cozah palik duty a tuah mi hna nih june 30 ni ah khan Ethiopian ram mi pakhat cu thih lak in an kah ruangah July 2 ah khan Israel ram chungum mi Ethiopian ram mi hna nih Israel cozah sin ah an lungtlin lo nak bia an rak chim bal cang i,cu hnu ah july 8 ni khan a cozah sin ah biatak tein an duh lo nak an langhter t’han i,hi konghe pehtlai in Israel ram chungah miphun thleidan nak um lo in a cozah nih biachahnak a tuah hlan lo paoh cu kan ma ti lai lo tiah an chim.

Israel cozah Palik hna nih Ethiopian ram mi an kah mi hi a min ah Mr Solomon Tekah ti a si,a mah hi a chuah kehnak ram cu Ethiopian ram mi a si na in Israel ram chungah a t’hang lian mi a si.a tu ah cun Israel ram mi taktak a si ko na in a chuahkehnak Ethiopian ram a si caah Ethiopian ram mi hna nih cun Israel palik pawl hna nih miphun thleidan nak in rian an t’uan tiah an zumh caah a si tiah an chim.

 

Cun, mithi hna chungkhar nih cun Judah miphun hna nih ni sarih chung an sunhsak mi ni ah cun zei hmanh tuah lo in um i,cu ni sarih a dih le cangka in Israel palik pawl hna nih Mr Solomon Tekah cungah an tuah mi bantuk hi midang cungah kan tuahti lai lo tiah an chim hlan cu duhlohnak kan langhter peng lai tiah an chim.

Source: CNN