American ram le Iran ram i doh/kalh nak ruangah Hizbollah ralhrang pawl hna nih cun fak taktak in American le Israel cu a hro t’han hna.Hizbollah misual pawl an hruaitu a si mi Hassan Nasrallah nih cun American nih Iran ram chungah a kuan fang le hriamnam a phanh ter a si ah cun Israel ram cu vutcam le hell mei a lo lai tiah a chim.
American ram nih Iran ram cungah a tuah ser ning hoih paoh in Israel ram cungah lehrulhnak kan tuah peng ve lai.cun, Israel ram rawh nak dingah hriamnam tling khitkhet tein kan neih i,Israel ram rawh nak ding caah dothlatnak zong kan tuah dih cang.asinain American a cawlcangh ngam taktak rih lo caah zei hmanh kan tuah rih lo nak a si tiah a chim.
Cun, Israel cozah nih a cawlcangh nak cem a si mi hmun hna Rili sen le Ben Gurion International Airpory ah a cozah ralkap a chiah nak hmun le Israel ram chunga a si mi Eilat khua le Ashdod khuapi vialte hna cu cikhat ah rawh dih in an um lai.Israel ram mi vialte hna zong hloh thlau dih an si lai in Israel ram hrimhrim,an ram dih lak in mei in khangh dih an si lai tiah Mr Hassan Nasrallah nih cun a chim.
Hizbollah ralhrang pawl pawl hna hi (Shia Muslim) pawl hna kha an si i,kum 2006 lio ah Israel he fak ngai in an i do bal cang.Shia Muslim pawl hna nih cun Israel he kan rak i doh lio ah cun hriamnam tling tein kan rak nei lo,asinain kum 13 karlak ah Israel ram rawh khawh nak dingin hriamnam cu tlamtling tein kan neih dih cang.Israel nih a kan hmuh ning bantuk kan si ti lai lo tiah a chim.
Source: BBC
