Kalay Peng Pasal Tha PDF Biachim Mi Cu Lih A Si Tiah General Zaw Min Thun Nih A Cohlang Duh Bak Loh

Sagaing ramthen lei ah rallokap mawtaw bomb puah nak kong khuami vengtu phu nih chim mi cu rallokap lei nih an cohlang lo.Cu lawng si lo in Kalay lei kahdohnak zong ah PDF nih cathanh a chuah mi le rallokap nih chim mi ah bia a kalh.Sagaing ramthen, Pale peng, Pidaunkung lam cung i rallokap mawtaw cu PDF nih ni 4 ni ah kan kah tiah PDF lei hruai tu pakhat nih a chim.“Pale lam lei zong ah kanmah Pale peng PDF ralkap pawl nih mawtaw pakhat cu kan puah ko.Mah motor cung i a ummi cu a thi mi an um ko lai”.

Pale peng chung ah rallokap pawl a rannak in i thial ding in Pale PDF nih August 11 ah ralrin nak ca an chuah hnu ah atu bantukin kahdohnak thawng a chuah hi a si.Cun nizaan ah Yin Ma Pin khua lei zong ah Hmungzua lei in a rak kir mi rallokap mawtaw pawl cu Kaungsinh khua pawng motor lam cung ah PDF nih kan kah hna tiah PDF hruaitu nih a chim.Khua mi zong nih Bomb voi 5 hrawng a puah ah motor pa 2 cu a rawk ko na’n aa hliam mi cu an um lo tiah an chim.

Asinain hi kong he pehtlai in rallokap lei in chimnak nawlngeitu General Zaw Min Thun nih a cohlang lo.“A um lo.Khoi ka lei ah dah an kan kah kan thei lo”.Kalay Peng, NatChaung khua chung ah a lut mi rallokap pawl cu nizaan August 12 chun hnu ah Pan Mon Chaung khua pawng ah Kalay PDF nih an kah hna i rallokap lei in 3 an thi tiah PDF lei nih cathanh an chuah.PanMumChaung khua pawng Yi Su khua i khuami pakhat nih cun nizaan kahdohnak ruang ah khua mi a thong leng inn le lo kal tak in an zaam dih tiah a chim.

“Hriamngan in an kah tik ahcun PanMumChaung, Hakhalay, cu kan tli dih. minung 2500 hrawng kan si”.Rallokap lei chim nak nawlngeitu General Zaw Min Thun nih cun Kalay peng, Natchaung khua lei ah cun kahdohnak zeihmanh a um lo nain hriamnam le a puak kho mi thil ri pawl kan tlaih mi cu a um tiah a chim.“Nizaan cu Kalay lei lawng ah a si. Kalay Peng, NatChaung khua ah Private Sianginn tiah thawng kan theih mi a um i kan va kal tik ah meithal le zenkuan, a puak kho mi thilri pawl kan hmuh.Hi he a pehtlai mi minung 2 kan tlaih. Mah lawng si ko”.Atu lio ah rallokap nih NatChaung khuachung ah hmunhma an lak caah kahdohnak a chuah khawh ruang ah Kalay le Gangaw karlak ah motor thlalang hon in tlun kal ding in Kalay PDF nih ralrin a pek.

Credit: VOA Burmese News