Kalaymyo Khuapi Le Chinram Mindat Khuapi Chung Dawr Vialte Khar Lo Ding Nan Awn Dih Lai

Mindat Le Kalaymyo Ah February 1 Dawr Khar Lo Ding Tiah An Au!Chin ramkulh, Mindat khuapi le Sagaing ramṭhen, Kalay khuapi chungah February 1 dawr a khar mi dawrngeitu hna cu dantat nan si lai, tiah nihin January 27 ah ralhrang phu nih laud speaker in an au, tiah theih a si.

 

February 1 cu ralhrang nih hramhram in nawlngeihnak an laak kumkhat a tlin ni a si caah leng chuah lo tein, dawr khar dih ding in duhlonak kan langhter lai, tiah ramchung vialte timhtuahnak ngeih a si. Mindat khuapi chung ah cun ralzaam hna inn i an tlun/kir lo ahcun an inn hna cu kan in kharpiak hna lai, tiah laud speaker in an au, tiah theih a si.

Sagaing ramṭhen, Tamu (တမူး) in meng 4 a hlat mi check gate cu Tamu-PDF Battalion 4, TSG le BSO aa fonh mi phu hna nih nihin January 27 zinglei Sml 10:00 hrawng ah an kah hna, ralhrang 3 an thi i, tamlak nih hliam an tuar, tiah Tamu-PDF Battalion 4 nih cathanh a chuah. Cuka hmun Tamu (တမူး)in meng 4 check gate ah a rak fonh mi Pyo Saw Htee hna cu Mizapi vengtu ralkap TSG le BSO aa fonhmi phu hna nih bomb in an puah ṭhan hna i a hliam mi an um. Mizapi vengtu ralkap phu hna cu a hliam mi um lo tein hnu an tolh kho, tiah theih a si.

Credit: The Chin Post

Author: Salai Ephraim