Kan Chinram Paletwa Buaibainak Kongah Zeiruang Ah Dah Chin State NLD, UDP Le USDP Dai Zerzuar Pi In An Um Ko Hnga!

Kan Chinram a si mi Paletwa ram kulh chungah AA tapung pawl hna nih duh paoh in an cawlcang i,an Duh le an mit a thi deuh mi Nu hna cu ningcang lo in an sualpi hna,Ngakchia thlu lo,Tar thlulo an tleih hna i an thah cuahmah hna ti cu ni fa tin in thawngpang theih a si.Kokek ralkap kan i ngeihmi CNF-A zongnih Kawl Cozah ralkap he biachahnak an tuah mi ah phomhpian hmasa si cu an duh fawn lo.hi ruangah mipi thinlung cu a fak hringhran ko cang!

Cun,kan theih bantuk in March thla ni 14 ah khan Paletwa Chin mi,minung 11 hna cu AA tapung le Kawl ralkap kah-doh nak ruangah thah an si.March thla 15 ah Chin mi,minung 9 thah an si fawn.March ni 16 ah thil cangmi kan theih dih.Paletwa ram kulh chung buaibainak konghe pehtlai in CNLD (Kokek party/Chin party)nih cun a ram or a ta a si mi cu a zoh sawhsawh khawh lo caah Statement cu a chuah.asinain CNLD nih hin zei ngaingai cu a tuah kho lem rih lo nain a ram a si mi a humhim nak kha a langhter tik ah mipi zong kan hna angam deuh.

Hi lio ah ruah awk ngai a si mi cu zeiruangah dah Chin State NLD, UDP Le USDP hna hi dai zerzuar pi in an kan um hnawh ko hnga ti hi a si?a ngaingai kan ti a si ah cun Paletwa ram buaibainak kongah cun Chin National party lawngin silo Chin State NLD, UDP le USDP hna zong an cawlcangh awk ngai cu a si!hi buaibai nak hi Ruling Party NLD, Chin cozah nih biatak tein vun cawlcang sehlaw a chia lei nak in thil t’ha lei cua pangh hrimhrim dingmi a si ko.


Cun,a tu hi CNF / A cu Conference an neih cuahmah lio a si.CNF/A nih hin kahdeihnak NCA minsen cu an thut ko na in Paletwa ram chung buaibai nak kongah Chinram le miphun an humhim nak langhter nak caah Statement pakhat tal an chuah ve lo a si ah cun mipi nih sual phawt phu te an si lai.CNA/F chim lo Paletwa ram kongah cun CSO le Media lei zong nih mah le ti khawh tawk cio in t’an kan la cio.a bik in hi tibantuk thil a can lio ah cun a party ah kan buaibai awk a si lo i,a miphun tu in kan t’an rual a herh bik.

Chin miphun huap in (NATIONAL) MOVEMENT tuah ding kan si naan,cu thil tuah dingah cun kan Chin miphun nih kan tlinh rih lo caah a si. party level ah hin Chin miphun cu aa za rih mi kan lo.Paletwa buaibainak kongah ZCD lei zong zei hmanh an tuah mi theih awk pakhat hmanh a um rih fawn lo.Kawl thluak kan theih lo ruangah kan Chin mipi nih kan tuar cuahmah cang.cun,Paletwa ram buaibai nak kongah kan Chin miphun cu kan mual a pho cuahmah i hruaitu t’han kan um lo ning le Chin miphun kan lung a rual lo ning hi miphun dang nih an theih chin lengmang i zei ah an kan rel lo chin lengmang lai ti cu a fiang taktak.zeitluk in dah hruaitu t’ha kan herh ti le zei tluk in dah lungrual kan herh ti cu nang mah tein i ruak ve ko cang.