Kan Kawlram Pi Cu A Tu Hi Sipuasi Lei Ah A Lethnih Le Letthum In A Talk Lio Si

Rumnak lam phunkhat.2020-2021 kum Vawlei cung ram tampi cu sipuazi ah an tla pah cio, cu lak ah Kawlram cu a lethnih a letthum in a tlak thluamah lio a si. Tangka man zong a tum (depreciation), tangka man ngeih lonak a kai, thilman a kai (inflation) a sang chinchin tik ah phaisa a fang in ban ah maw, inn ah i chiah ahcun a man a zor lei a panh caah ramdang phaisa, sui, vawlei hmun le inn ti bantuk in man ngeihmi i cawk cio ah a tha tiah ruah a si i phaisa ah thlen khawh than colh a si mi (liquidation) a fawi bik hi ramdang phaisa a si, dollar a hring a si, Euro, Yen, Yuan le Baht tibantuk zong an tha thiamthiam. Thlen an fawi. Asinain a lam dang pakhat cu Stock i cawk hi a si.

YSX timi Yangon Stock Exchange ah Kawlram i kampani ngan pipi pa 7 nih stock an zuar. Cu kampani hna cu FMI, MTSH, MCB, FPB, TMH, ERF, AMATA an si hna.
FMI hi First Myanmar Investment Public company ti a si i Yoma bank ngeitu, FMI city le garden city satu, Cun real estate pawl Thanlynn i Star City, Peninsula Plaza, Yoma Central, Pun Hlaing Sizung, Yoma Siloam Sizung pawl hi an rian biapi pawl an si. Kum 28 a si cang i share a cawtu (shareholders) hi 8,600 an si. Share pakhat ah 8,900 a si. MTSH hi Thilawa SEZ ah 41% share a ngeimi an si i kampani pa 9 ngeitu pawl nih rak dirhmi a si. Thilawa SEZ hi Japan nih 49% an ngeih i Kawl cozah nih 10% le hi MTSH nih 41% a ngei i share a ngeitu hi 17,000 leng an si cang i share pakhat ah 3,200 Kyat in a zuar.


MCB hi Myanmar Citizens Bank a si i kum 30 a tling ve cang. 52 billion kyat hrawng a ngei i ramchung ah ban 49 an ngei. Share pakhat ah Ks-7,800 in an zuar. First Private Bank Ltd. (FPB) hi kum 30 a si ve cang i nizan nai a thimi Dr. Sein Maung nih Kawlram ah private a rak thawk hmasa bik tu a si 88 kum ah a thawk. Share pakhat ah 20,500 Kyat a si. Ramchung ah bank 35 an ngei.TMH Telecom Public Co., Ltd. Hi internet tower sak, internet fiber hri zam le phone mobile top-up phaisa pek rian hi an tuan i 2007 ah an dirmi a si. 2018 ah YSX ah a lut ve i Share pakhat ah 2,700 in an zuar.
EFR -Ever Flow River Group Public Company hi Logistics kampani a si i ramchung ramleng thil kuat le phawtzamh (total logistics) a tuahmi a si, 2014 ah dirhmi a si nain a than a rang taktak.

 

Asinain YSX an luh ah rai le ral aa thawk i a cawmi an tlawm. Share pakhat ah 3,100 Kyat a si. Amata Holding Public Co., (AMATA) hi 2017 ah dirmi a si i hotel le resorts pawl an tuan i Bagan, Inle, Ngapali ti bantuk pawl ah hotel lei rian an tuan.Share pakhat ah 4,800 Kyat a si. Tukum June ah YSX ah a lutmi an si (listed).Hi kampani vialte fonh dih i zapi ngeihchiah lengpommi aman (Base market value) market cap tiah an auhmi zapi fonh dih ah 401 a si i Myanpix Index tiah an auh. YSX an rak thawk ka March 2016 ah Myanpix hi billion Kyat 1161 a rak si nain nihin ah 401 ah a tla. Hihi zoh ah an zapi zeitluk dah stock a tum a kai kha theih khawh a si.Cucaah phaisa kum 5 in kum 10 tiang tongh lo in ka chiah lai ti ahcun Stock hi cawk ah a tha. A miak hrim hrim ko lai. FMI le MTSH tbt pawl hi i cawk i i chiah ah a tha.

Ban ah security account i tuah i cu in cun cawk le zuar khawh peng a si i, ram buai le sipuazi tlak lio a si caah nifa le caan tawi i celh awk ahcun a tha lo nain kum saupi tongh lo in ka chiah ko lai tiah na ti ahcun atu lio a tum lio te ah i cawk ve law tongh lo zoh lo in kum saupi na chiah ah a kai hrimhrim lai i duh tik ah na zuar in na bank account ah phaisa an in kuat colh ko lai. Na fale le hmailei caansau caah a tha.US ah mirum Bill Gate zong hi Bill & Melinda Gate Foundation tiah 2011 ah billion $21.3 a rak hlut i cu hlutmi cu tonh lo in stock ah an rak cawk i (Microsoft) tam deuh an cawk i tonh bak lo in nihin ah hi foundation nih billion $294 a hmuh cang. Cuticun pumpak a rummi Rockefeller siseh Amazon a ngeitu Jeff Bezos te pawl zong nih an kampani a kai lio ah an phaisa an chuah i pumpak zung in stock an i cawk than i family office hi an tuah cio. Na ngeihmi phaisa hram kha tonh bak lo i passive income timi hmuh na duh ahcun stock hi a tha. Passive income timi cu mah tuan lo le mah tel lo in hmuh khawhnak “hlawh” hi a si i cu lam cu Stock i cawk hi a si.

By.Sui Hingz