Kan miphun luatnak a duhmi le Min Aung Hlaing uknak hrawh na duh maw

Ral tei a duhmi nih CDF dirpi le hmaizah a herh!CNF le CDF hi atu lioah Chin miphun nih kan ralkap an si. Kan miphun luatnak a duhmi le Min Aung Hlaing uknak hrawh a duhmi poh nih CNF/CDF le PDF hi kan dirpi ding le an nawl kan ngaih hna ding a si ko. AA nih Rakhine mi pawl kha covid lio si le leng ah chuak hlah uh a ti hna le mipi nih an ngaih bak.


CNF/CDF nih a herh an ti le curfew an chuah lai. A herh an ti can ah mipi kha cutin khatin um uh an kan ti lai.Ral tei a duhmi nih cucu kan zulh a hau.Kawl rallokap vial ttih ngang i CDF vial zeirello/ngamh ngang zong hi thilsining a si lo.Kan philh lo dingmi cu nihin hi ramchung ralpi (civil war) kan thawh lio a si. Kan miphun dothlennak mei alh a fah lingcing a si.


Cucaah ‘nawlpeknak pakhat (under one command and control) tangah um dih a herh lio can a si. Democracy ee, human rights ee tiin, kan duh poh in chimrel mah-cang-ca-re in rak um caan a si lo.Hi dothennak ah naa/kaa tel ve lai maw? Naa/kaa tel lo ahcun dai tein rak um a hau. Hna rak hnawh bak lo a hau. Hnahnokmi cu chimhhrin a hau ko lai. (Uknak tha vial duh ngai tung i mah vial tindum tia zong thazang chuah duh lo zong a ngah lo).

CDF/CNF nih ka nu ka pa, ka u ka nau, ka khuami, ka pastor, ka pengtlangmi an tlaih zongah ka zai lai lo timi lungput kan ngeih viar a hau. A tha bik in kan ralkap nih khua an khanmi le thil an tuahmi kha 100% kan pom khawh a hau ral tei a duh taktakmi kan si ko ahcun.Teinak ca ding ahcun a herh ahcun kan tuar cio hau. Kan lungput pipuam seh. Caan that lio le ramdaih lio can khuaruah in ruah dih awk a tha lo hih.Miphun ram kan hran lio fawh a si hih. Na ralkap CDF kha phunzai lo tein upat law bawm ko tuah. Cucu miphun le ram caah thiltha pakhat na tuah a si lai.

Credit: Salai Ceu Bik Thawng