Nihin August 25, 2019 chun suimilam 2:30pm ah khan Kawlram ralkap bawizik a simi senior general Min Aung Hliang nih Naypidaw pawng, Pinmana ah a um mi St. John Biakinn i Pathian rian ttuan pawl caah tiah facang, chiti le phaisa bomhnak tam ngai a pek hna tiah theih asi. Cun nihin bomhnak a pek hna lio ah ralbawizik Min Aung Hliang nih cun “Tlangcung miphun (Chin miphun) pawl nih ralkap an ttuan zong ah rank sang pek an si lo, a sangbik ah Bogyi rank tiang lawng pek an si” timi kong a theih nak le a lung thatlonak tete zong a chim chih ti asi.
“Tlangcung miphun chung in ralkap a ttuan mi pawl rank sang an pek duh lomi hna hi a hlan Kawl miphun chung in ralkap upa pawl an ruahnak le lungthin hmuh ning a niam tuk bia asi. Hi bantuk ruang ah nihin tiang remnak a harsa bantuk ah a cang. Hi bantuk in tlangcung miphun in Kawl ralkap a ttuan mi cung i ruahnak thinlung an ngeih ruang ah hin tlangcung miphun nih Kawl miphun cungah an zumhnak le ngatchannak zong a chiat chuah i hi dirhmun hi kum tampi a rau rih lai” tiah upa pakhat nih a chim ti asi. A tu ahcun ralbawizik Min Aung Hliang nih thil sining a theih, hi hi thil dik lo a si timi a fiang ngai ngai. Cu ruang ah tlangcung miphun pawl he remnak sernak ding ah le daihnak ser khawhnak ding lam aa zuam cuahmah ve ko” tiah ramkhel upa pakhat nih cun a chim fawn ti asi.
“Kawlram mipi dihlak ih hi konglam hi an theih cio lai i Min Aung Hliang nih hin rampi daihnak tuah a timh taktak ko cang lai maw tiah an ruah cio ko lai. A ngai ngai ti ahcun Kawlrawl ah a thudir mi si hna seh tlangcung ah a tthudir in khua a sa mi si usih, lungrual te tu in kan um a herh i ramdang nih Kawlram an doh hmanh ah a tthangti ding lehlam kan si. Min Aung Hliang nih zeiruang ahdah Khrihfa sin ah hi zatzat bomhnak a pek, a duhnak le aa tinh mi taktak zeidah a si timi cu theih cio kan duh ko lai. Zei a si hmanh ah Min Aung Hliang nih RC saya pawl bomhnak a pek mi hna cungah lunglawmhnak ngan pi a um ko, cun thatnak lei lam a panh nak a si ko lai timi zumhnak kan ngei” tiah a tarlangh fawn.
Note: Hi cabia le thawngpang hi RC Saya Baka kham kham sin in lak mi asi. Chin Future timi nih Falam ca in a tial mi a si i a tawinak in Hakha holh in kan leh chin mi asi.A chung cabia vialte hi V.O.M ruahnak si loin, Falam holh tial mi kha Halkha holh in kan leh mi tu asi.
Credit: The Voices of Miepi ( website )