Kawlram Mipi Cu Chanthar In A Hlun Chan Ah Kir Pi Dawh In Kan Um Cang

Thla 6 hnu ah SAC in Caretaker ah(Thla 6 chung ah an tuan khawh bik mi)1962 kum tlangval Ne Win chan ah kan kir mang rua. 2023 August thla tiang nawlngeihnak kaa hum rih lai ti a si. “Ningcanglo thimnak” ti i tlaih riangmang in, “Adik mi thimnak tuah than ding le upadi ning in thimnak tuah ding,” tiin nawlngeihnak cu apei ah aa hum i kan ram cu a karkalak ah aa ceh, a tonenh chapbei.Phungki pawl nih July 31 zaan duhlonak an langhter mi kha adik. “Thla 6 a tling cang. Ram hrawh cu na cim kho hin rih lo maw,” tiah biahalnak cataar put in an langhterhnawh.

Thla 6 a tlin ni ah State Administrative Council (SAC) cu The Caretaker Government (Innhngak Cozah) ah a kirpi.Thla 6 chung ah zeidah an tuan khawh bik? Cucu mizapi mithmuh a si ko. Ram sifak bik tawne ah kan tla. Ram sifak si chinchap, thil man kai chinchap, zapi zaraan kan thiang. Rammi thisen le mitthli hnawh cawk ding a si ti lo. Lungrethei le sivang in thong ah hren rih mi an tam lengluang fawn. Ral do loin rammi doh, tlaihkhih, hrem le tukthah hi a thiam bik mi a si ko rua. Furpi ngaidaw lak ah unau fahniang rual minung zeizat nih dah ram caah lu an pek mu.

A lainawnnak hi hriamnam lawng in a si lo. Nu khatlo Pa dang a unau ser COVID-19 zong aa phua rih. Siibawi thiamsang nih an chuahtak dih ca ah mizaw zohkhenhtu kan ngei lo. Nunnak thaw kong cu Pathian nawl a si. Asinain, ramdai le cozah tha sisehlaw a thi rih lo ding an tampi. Minung lei nih tuan herh mi rian kha tuan manh loin thihzaat hlan ah mual a liam mi an tam ko cang. Zeitluk ngaihchia le khuacimui dah kan si.

Thla 6 chung ah an tuah khawh bik mi cu, mi tlaih, hrem, hren, thah, rammi doh le kah hi a si ko. Fir le chuh, tlaihhrem tehna an hmang chap rih. COVID-19 zong hi an zohsawh ko lai. Anmah nih tawlrel cu chimlo sii cawk hmanh pei an kham cu. Anmah ngeih mi oxygen cu rammi zuarh lo ding an ti rih. Rammi nunnak hi zeite ah an rel lo. An hritida a thak lo. Thla 6 chung ah thiltha pakhat hmanh an tuah khawh lo mi khi annih ca ah an rak tuah khawh bik mi a rak si ko rua aa lingtalet dih!

Credit: The Hakha Times