Kawlram Mipi Vialte Hna Caah USA Cozah Bawmhnak Pek A Timh Mi Cu Senate Nih Cohlan Nak A Tuah Cang

NDAA min in Kawlram bawmhnak $470 million cu HR7900 in fehter asi cang.Senate ah an kuat colh lai, Senate ah an pass nak lai thlacam hna usih tiah thanhnak an rak tuah mi cu “Kawlram bawmhnak NDAA $470 M cu USA Senate nih “YES” a ti cang. President min thut lawng a bau cang”tiah Thlaawr Bawihrin nih a vun update than cang.

Relchap; U Kyaw Moe Htun cu UN ah Myanmar ram palai si rih ding in rian an khinh chap December 13 – UN nih SAC palai cu an cohlang lo i U Kyaw Moe Htun cu a rian pehzulh in khinh a si rih tiah NUG thawngzamhnak PVTV nih a chim.December 12 ah an tuah mi UN meeting chung ah UN Credentials Committee nih U Kyaw Moe Htun cu a rianṭuan caan kumkhat samh a si tiah an thanh tiah a chim.

Credentials Committee nih fehter mi thawngthanhnak a chuak rih lo nain amah cu rian khinh rih ding in hnatlaknak kan ngek tiah U Kyaw Moe Htun nih VOA English ah a chim.U Kyaw Moe Htun cu Myanmar ram palai ah riankhinh rih ding in Russia dah ti lo adang Credentials Committee chungtel vialte an hna a tla i Russia nih a hrawh lai an phan caah an rauhnak a si tiah AJ Jazeera thawngzamh nih a langhter.

UN he pehtlai in Myanmar ram palai U Kyaw Moe Htun cu NLD cozah nih rian an khinh mi a si i hramhram in uknak lak a si hnu zong ah Myanmar ram mipi hna he a dirṭi.Cucaah SAC nih U Kyaw Moe Htun cu a rian in phuah a si cang tiah an thanh ko nain UN nih atutiang ah Myanmar ram palai si rih ding in rian an khinh.

Credit: The Chinland Post

Author: Salai Ephraim